ബ്രിസ്‌ബെയ്ന്‍: ഇംഗ്ലണ്ടിനെതിരായ ആഷസ് പരമ്പരയിലെ ആദ്യ ടെസ്റ്റില്‍ ആസ്‌ത്രേലിയ പൊരുതുന്നു. ഇംഗ്ലണ്ടിന്റെ ഒന്നാം ഇന്നിങ്‌സ് 302 റണ്‍സില്‍ അവസാനിപ്പിച്ച ഓസീസ് രണ്ടാം ദിനം കളി നിര്‍ത്തുമ്പോള്‍ നാല് വിക്കറ്റ് നഷ്ടത്തില്‍ 165 റണ്‍സെന്ന നിലയില്‍. ആറ് വിക്കറ്റുകള്‍ ശേഷിക്കേ ഇംഗ്ലണ്ടിന്റെ സ്‌കോറിനൊപ്പമെത്താന്‍ ആസ്‌ത്രേലിയക്ക് 137 റണ്‍സ് കൂടി വേണം.
ക്യാപ്റ്റന്‍ സ്റ്റീവന്‍ സ്മിത്ത് (64), ഷോണ്‍ മാര്‍ഷ് (44) എന്നിവരാണ് ക്രീസില്‍. 76 റണ്‍സെടുക്കുന്നതിനിടെ നാല് വിക്കറ്റ് നഷ്ടപ്പെട്ട് പതറിയ ഓസീസിനെ അഞ്ചാം വിക്കറ്റില്‍ ഇരുവരും ചേര്‍ന്ന് കരകയറ്റുകയായിരുന്നു. ബെന്‍ക്രോഫ്റ്റ് (അഞ്ച്), വാര്‍ണര്‍ (26), ഖവാജ (11), ഹാന്‍ഡ്‌സ്‌കോംപ് (14) എന്നിവരുടെ വിക്കറ്റുകളാണ് ഓസീസിന് നഷ്ടമായത്. ഇംഗ്ലണ്ട് നിരയില്‍ ആന്‍ഡേഴ്‌സന്‍, ബ്രോഡ്, മോയിന്‍ അലി, ജാക്ക് ബോള്‍ എന്നിവര്‍ ഓരോ വിക്കറ്റ് വീഴ്ത്തി.
നേരത്തെ നാല് വിക്കറ്റ് നഷ്ടത്തില്‍ 196 റണ്‍സെന്ന നിലയില്‍ രണ്ടാം ദിനം ബാറ്റിങ് തുടങ്ങിയ ഇംഗ്ലണ്ടിന് 106 റണ്‍സ് ചേര്‍ക്കുന്നതിനിടെ ശേഷിച്ച ആറ് വിക്കറ്റുകളും നഷ്ടമായി. ആദ്യ ദിനത്തില്‍ സ്റ്റോണ്‍മന്‍ (53), ജെയിംസ് വിന്‍സ് (83) എന്നിവര്‍ മികച്ച പ്രകടനം പുറത്തെടുത്തു.
പിന്നീട് മധ്യനിരയില്‍ ഡേവിഡ് മാലന്‍ (56), മോയിന്‍ അലി (38) എന്നിവരും പിടിച്ചുനിന്നു പൊരുതി. എന്നാല്‍ ഇരുവരും പുറത്തായ ശേഷം ഇംഗ്ലീഷ് ബാറ്റിങ് നിര അധികം ക്രീസില്‍ തുടര്‍ന്നില്ല.
ഓസീസിനായി പാറ്റ് കമ്മിന്‍സ്, മിച്ചല്‍ സ്റ്റാര്‍ക്ക് എന്നിവര്‍ മൂന്ന് വീതം വിക്കറ്റുകളും നതാന്‍ ലിയോണ്‍ രണ്ട് വിക്കറ്റും ഹാസ്‌ലെവുഡ് ഒരു വിക്കറ്റും വീഴ്ത്തി.