കോഴിക്കോട്: വിവിധ മേഖലകളില്‍ ഭിന്നശേഷിക്കാര്‍ തങ്ങളുടെ പ്രാഗല്‍ഭ്യം തെളിയിക്കുന്ന കാലത്ത് കാര്‍ഷിക മേഖലയിലും അവര്‍ മുതല്‍ക്കൂട്ടാകാനുള്ള അവസരമൊരുക്കുകയാണ് ഭാസിം അക്തറും കെ.എസ് പ്രസാദും.
ഭിന്ന ശേഷിക്കാരെ കാര്‍ഷിക മേഖലയുമായി അടുപ്പിക്കുകയെന്ന ലക്ഷ്യത്തിനായി സോളാറിലും ബാറ്ററിയിലും പ്രവര്‍ത്തിക്കുന്ന മള്‍ട്ടി പര്‍പ്പസ് അഗ്രികള്‍ച്ചറല്‍ മെഷീന്‍ എന്ന ഉപകരണവുമായാണ് തൃശൂര്‍ കൊടുങ്ങല്ലൂര്‍ ഗവ.ബോയ്‌സ് ഹയര്‍സെക്കന്ററി സ്‌കൂളിലെ ഈ മിടുക്കര്‍ എത്തിയിരിക്കുന്നത്. വിത്തിടാനും കിളക്കാനും യാതൊരു പ്രയാസവുമില്ലാതെ ഈ ഉപകരണം കൊണ്ട് സാധിക്കും. യന്ത്രത്തില്‍ ഘടിപ്പിച്ച സ്വിച്ചുകള്‍ മുഖേന ഇരുന്നു കൊണ്ട് തന്നെ കിളക്കാനും വിത്തിടാനും വെള്ളം നയ്ക്കാനും സാധിക്കും. ഹയര്‍സെക്കന്ററി വിഭാഗം വര്‍ക്കിങ് മോഡല്‍ വിഭാഗത്തില്‍ മത്സരിക്കാന്‍ എത്തിയ ഇരുവരും കഴിഞ്ഞ മൂന്ന് വര്‍ഷം കൊണ്ടാണ് ഉപകരണം വികസിപ്പിച്ചെടുത്തത്.