തൊടുപുഴ: ചലച്ചിത്ര - നാടക - സീരിയല്‍ നടി തൊടുപുഴ വാസന്തി(65) അന്തരിച്ചു . അര്‍ബുദം ബാധിച്ചതിനെത്തുടര്‍ന്ന് ദീര്‍ഘനാളായി ചികിത്സയിലായിരുന്നു. വാഴക്കുളത്തെ സ്വകാര്യ ആശുപത്രിയില്‍ ഇന്നലെ പുലര്‍ച്ചെ നാല് മണിയോടെയായിരുന്നു മരണം. കടുത്ത പ്രമേഹം മൂലം വലതുകാല്‍ മുറിച്ചുമാറ്റിയിരുന്നു.
തമിഴ് ഉള്‍പ്പെടെ 450 ഓളം ചിത്രങ്ങളില്‍ അഭിനയിച്ചിട്ടുണ്ട്. 2012 ല്‍ കേരള ഫിലിം ക്രിട്ടിക്‌സ് അസോസിയേഷന്റെ ചലച്ചിത്ര പ്രതിഭാ പുരസ്‌കാരം ഉള്‍പ്പെടെ നിരവധി അവാര്‍ഡുകളും ലഭിച്ചിട്ടുണ്ട്. സംസ്‌കാരം ഇന്നലെ വൈകിട്ട് 4ന് മണക്കാടുള്ള സഹോദരന്റെ വീട്ടുവളപ്പില്‍ നടത്തി. തൊടുപുഴ മണക്കാട് ഇളംബ്ലാശ്ശേരിയില്‍ കുടുംബാംഗമാണ്. പരേതനായ രാജീന്ദ്രനാണ് ഭര്‍ത്താവ്. മക്കളില്ല.
മമ്മൂട്ടി, സിദ്ദിഖ് തുടങ്ങി നിരവധി ചലച്ചിത്ര താരങ്ങളും രാഷ്ട്രീയ പ്രമുഖരും വീട്ടിലെത്തി അന്തിമോപചാരം അര്‍പ്പിച്ചു.