തലശ്ശേരി: സഹപ്രവര്‍ത്തകരുടെ പ്രൊവിഡന്റ് ഫണ്ട് വായ്പയില്‍ തിരിമറി നടത്തിയ കേസില്‍ പ്രതിയായ പ്രധാന അധ്യാപകന് തടവും പിഴയും. കാസര്‍കോട് ജില്ലയിലെ കീഴൂര്‍ ഗവ. യു .പി .സ്‌കൂള്‍ പ്രധാനാധ്യാപകന്‍ എം.ജെ ജോസിനെയാണ് മൂന്ന് വര്‍ഷം വീതം തടവും വിവിധ കേസുകളിലായി മൂന്ന് ലക്ഷം രൂപ പിഴ അടയ്ക്കാനും തലശ്ശേരി വിജിലന്‍സ് ജഡ്ജി കെ. ബൈജുനാഥ് ശിക്ഷിച്ചത്. പിഴ അടച്ചില്ലെങ്കില്‍ മൂന്ന് മാസം അധിക തടവ് അനുഭവിക്കണം.
സ്‌കൂള്‍ അധ്യാപകര്‍ പി.എഫ് വായ്പ അപേക്ഷ പ്രധാന അധ്യാപകന് നല്‍കിയിരുന്നു. അനുവദിച്ചു കിട്ടിയ വായ്പാ തുക അപേക്ഷകര്‍ക്ക് നല്‍കാതെ പ്രധാന അധ്യാപകന്‍ തിരിമറി നടത്തിയതിനെ തുടര്‍ന്ന് സഹഅധ്യാപകര്‍ കാസര്‍കോട് വിജിലന്‍സ് ഡിവൈ.എസ്.പിക്ക് പരാതി നല്‍കിയിരുന്നു. ഇതേ തുടര്‍ന്ന് 2002-ലാണ് വിജിലന്‍സ് പ്രധാന അധ്യാപകനെതിരേ കേസ് രജിസ്റ്റര്‍ ചെയ്തത്. പരാതി പ്രകാരം ആറ് കേസാണെടുത്തിരിക്കുന്നത്.
ഇതില്‍ നാല് കേസുകളിലാന്ന് വിജിലന്‍സ് കോടതി ശിക്ഷ വിധിച്ചത്. ഒരു കേസില്‍ പ്രധാനധ്യാപകനെ കുറ്റവിമുക്തനാക്കിയിട്ടുണ്ട്. ഒരോ കേസിലും രണ്ടു വര്‍ഷം വീതം തടവാണ് ശിക്ഷ വിധിച്ചത്.
എന്നാല്‍ ഒന്നിച്ച് അനുഭവിച്ചാല്‍ മതിയെന്നതിനാല്‍ ആകെ ശിക്ഷ രണ്ടു വര്‍ഷമാണ്. മൂന്ന് ലക്ഷം രൂപയുടെ തിരിമറിയാണ് തെളിഞ്ഞത്.