ചെറുവത്തൂര്‍(കാസര്‍കോട്): ഡ്രൈവര്‍ അപമാനിച്ചതിനെ തുടര്‍ന്ന് ഓടുന്ന ഓട്ടോയില്‍ നിന്ന് യുവതി ചാടിയ സംഭവത്തില്‍ പ്രതി അറസ്റ്റില്‍. കൊഴുമ്മല്‍ സ്വാമിമുക്കിലെ മുരിങ്ങാട്ട് കോളനിയിലെ അഞ്ചില്ലത്ത് വീട്ടില്‍ ഏ. ജി ഷാനവാസിനെ ( 21 ) ആണ് ചന്തേര എസ്.ഐ കെ.വി ഉമേശനും സംഘവും അറസ്റ്റ് ചെയ്തത്. പിലിക്കോട് തോട്ടംഗേറ്റ് എക്കച്ചിയില്‍ വടക്കേവീട്ടില്‍ സന്തോഷിന്റെ ഭാര്യ സവിത( 30 )ക്കാണ് സംഭവത്തില്‍ പരുക്കേറ്റത്. നവംബര്‍ 24 ന് ഉച്ചയോടെ പിലിക്കോട് ദേശീയപാതയില്‍ ആണ് സംഭവം. മകളുടെ വിദ്യാലയത്തില്‍ പി.ടി.എ യോഗത്തില്‍ പങ്കെടുക്കാന്‍ പോകുന്നതിനായാണ് സവിത ഓട്ടോയില്‍ കയറിയത്.
എന്നാല്‍ ഡ്രൈവറുടെ പെരുമാറ്റത്തില്‍ ഭയന്ന യുവതി ഓടുന്ന വണ്ടിയില്‍ നിന്ന് എടുത്തുചാടുകയായിരുന്നു. ഗുരുതരമായി പരുക്കേറ്റ സവിതയെ നാട്ടുകാരും അതുവഴി വന്ന വാഹനയാത്രക്കാരുമാണ് ആശുപത്രിയില്‍ എത്തിച്ചത്. തലയിലേറ്റ മുറിവിന് ശസ്ത്രക്രിയ വേണ്ടിവന്നതിനാല്‍ എട്ട് ദിവസത്തോളം മംഗളൂരുവിലെ ആശുപത്രിയില്‍ കഴിയേണ്ടിവന്നു. സംഭവത്തിന് ശേഷം ഷാനവാസ് നിര്‍ത്താതെ ഓടിച്ചുപോവുകയായിരുന്നു. കോടതിയില്‍ ഹാജരാക്കിയ പ്രതിയെ രണ്ടാഴ്ചത്തേക്ക് റിമാന്‍ഡ് ചെയ്തു.