സൂറത്ത്: വിദര്‍ഭയ്‌ക്കെതിരായ രഞ്ജി ട്രോഫി ക്വാര്‍ട്ടര്‍ പോരാട്ടത്തില്‍ കേരളം ലീഡ് വഴങ്ങി. വിദര്‍ഭയുടെ പോരാട്ടം 246 റണ്‍സില്‍ അവസാനിപ്പിച്ച് ഒന്നാം ഇന്നിങ്‌സ് ബാറ്റ് ചെയ്ത കേരളത്തിന്റെ ചെറുത്ത് നില്‍പ്പ് 176 റണ്‍സില്‍ അവസാനിച്ചു. 70 റണ്‍സ് ലീഡുമായി രണ്ടാം ഇന്നിങ്‌സ് തുടങ്ങിയ വിദര്‍ഭ മൂന്നാം ദിനം കളി നിര്‍ത്തുമ്പോള്‍ ഒരു വിക്കറ്റ് നഷ്ടത്തില്‍ 77 റണ്‍സെന്ന ഭേദപ്പെട്ട നിലയിലാണ്.
ഒന്‍പത് വിക്കറ്റുകള്‍ കൈയിലിരിക്കേ വിദര്‍ഭയ്ക്ക് 147 റണ്‍സ് ലീഡ്. 51 റണ്‍സുമായി ക്യാപ്റ്റന്‍ ഫസലും ഏഴ് റണ്‍സുമായി അക്ഷയ് വഖരെയുമാണ് പുറത്താകാതെ ക്രീസില്‍ നില്‍ക്കുന്നത്. 14 റണ്‍സെടുത്ത സഞ്ജയാണ് പുറത്തായ ബാറ്റ്‌സ്മാന്‍. മൂന്നാം ദിനം വീണ വിദര്‍ഭയുടെ ഏക വിക്കറ്റ് ജലജ് സക്‌സേനയാണ് സ്വന്തമാക്കിയത്.
നേരത്തെ രണ്ട് വിക്കറ്റ് നഷ്ടത്തില്‍ 32 റണ്‍സെന്ന നിലയില്‍ മൂന്നാം ദിനം തുടങ്ങിയ കേരളത്തിന് വിചാരിച്ചത് പോലെ റണ്‍സ് കണ്ടെത്താന്‍ കഴിയാഞ്ഞത് തിരിച്ചടിയായി. മികച്ച തുടക്കം കിട്ടിയിട്ടും മുന്‍നിര ബാറ്റ്‌സ്മാന്‍മാര്‍ക്ക് അവസരം മുതലെടുക്കാന്‍ സാധിച്ചില്ല.
കൃത്യമായ ഇടവേളകളില്‍ കേരളത്തിന്റെ വിക്കറ്റുകള്‍ വീഴ്ത്തി വിദര്‍ഭ മത്സരം തങ്ങള്‍ക്കനുകൂലമാക്കി.
40 റണ്‍സെടുത്ത ഓപണര്‍ ജലജ് സക്‌സേനയാണ് കേരളത്തിന്റെ ടോപ് സ്‌കോറര്‍. സഞ്ജു സാംസണ്‍ (32), രോഹന്‍ പ്രേം (29), സച്ചിന്‍ ബേബി (29), അരുണ്‍ കാര്‍ത്തിക് (21) എന്നിവര്‍ക്കെല്ലാം മികച്ച തുടക്കമിടാന്‍ സാധിച്ചെങ്കിലും വലിയ സ്‌കോര്‍ നേടാന്‍ കഴിഞ്ഞില്ല. അഞ്ച് വിക്കറ്റുകള്‍ വീഴ്ത്തി രജ്‌നീഷ് ഗുര്‍ബാനി മികച്ച ബൗളിങുമായി വിദര്‍ഭ ബൗളര്‍മാരില്‍ തിളങ്ങി. ലളിത് യാദവ്, സര്‍വതെ, വഖരെ, കരണ്‍ ശര്‍മ എന്നിവര്‍ ഓരോ വിക്കറ്റ് വീഴ്ത്തി.