ഗൂഡല്ലൂര്‍: കുരുമുളകിന്റെ വില തകര്‍ച്ചകാരണം തോട്ടങ്ങള്‍ പാട്ടത്തിനെടുക്കാന്‍ പോലും വ്യാപാരികള്‍ എത്താതായി. 

നീലഗിരി ജില്ലയിലെ ഗൂഡല്ലൂര്‍, പന്തല്ലൂര്‍ താലൂക്കുകളില്‍ തേയില കാപ്പിതോട്ടങ്ങളില്‍ ഇടവിളയായും തനിച്ചും ഏക്കറുകണക്കിന് കൃഷി ചെയ്തിരുന്നു.

നീലഗിരിയില്‍ പച്ചതേയിലക്ക് മതിയായ വില ലഭിക്കാത്തതിനാല്‍ കടുത്ത സാമ്പത്തിക പ്രതി സന്ധിയിലകപ്പെട്ട കര്‍ഷര്‍ക്ക് തെല്ല് ആശ്വാസമായിരുന്നു കുരുമുളകില്‍ നിന്നും കിട്ടുന്ന വരുമാനം.

അവസരത്തിനൊത്ത് മഴ ലഭിച്ചതിനാല്‍ മിക്ക തോട്ടങ്ങളിലും കുരുമുളക് ഉല്‍പ്പാദനം വര്‍ധിച്ചെങ്കിലും കഴിഞ്ഞവര്‍ഷം തുടക്കത്തിലുണ്ടായിരുന്ന വിലയേക്കാള്‍ പാതി വിലയാണ് ഇപ്പോഴുള്ളത്. ഗൂഡല്ലൂര്‍, പന്തല്ലൂര്‍ താലൂക്കുകളിലെ തോട്ടങ്ങളില്‍ കുരുമുളക് വള്ളികളില്‍ തിരി വീണാല്‍ പാട്ടകച്ചവടക്കാര്‍ എത്താറുണ്ടെങ്കിലും ഈ വര്‍ഷം വിളവെടുക്കാന്‍ ദിവസങ്ങള്‍ ബാക്കി നില്‍ക്കുമ്പോള്‍ പോലും കച്ചവടക്കാര്‍ എത്താത്തത് കര്‍ഷകരെ ഏറെ നിരാശയിലാക്കിയിരിക്കുകയാണ്.