ന്യോണ്‍: യുവേഫ ചാംപ്യന്‍സ് ലീഗ് പ്രീ ക്വാര്‍ട്ടറില്‍ കടുത്ത മത്സരങ്ങള്‍. നിലവിലെ ചാംപ്യന്‍മാരായ റയല്‍ മാഡ്രിഡിന് ഫ്രഞ്ച് കരുത്തരായ പാരിസ് സെന്റ് ജെര്‍മെയ്‌നും മുന്‍ ചാംപ്യന്‍മാരായ ബാഴ്‌സലോണയ്ക്ക് നിലവിലെ ഇംഗ്ലീഷ് പ്രീമിയര്‍ ലീഗ് ജേതാക്കളും മുന്‍ ചാംപ്യന്‍സ് ലീഗ് കിരീട നേട്ടക്കാരുമായ ചെല്‍സിയുമാണ് എതിരാളി. ഇറ്റാലിയന്‍ കരുത്തരായ യുവന്റസ്- ഇംഗ്ലീഷ് വമ്പന്‍മാരായ ടോട്ടനം ഹോട്‌സ്പറുമായാണ് ഏറ്റുമുട്ടുക. മാഞ്ചസ്റ്റര്‍ യുനൈറ്റഡിന് സെവിയ്യയും ലിവര്‍പൂളിന് പോര്‍ട്ടോയും കനത്ത വെല്ലുവിളിയുമായി നില്‍ക്കുന്നു.
അതേസമയം മുന്‍ ചാംപ്യന്മാരായ ബയേണ്‍ മ്യൂണിക്കിന് താരതമ്യേന ദുര്‍ബലരായ ബെസിക്റ്റസിനെയാണ് എതിരാളികളായി കിട്ടിയത്. ഇംഗ്ലീഷ് പ്രീമിയര്‍ ലീഗില്‍ പരാജയമറിയാതെ കുതിക്കുന്ന മാഞ്ചസ്റ്റര്‍ സിറ്റിക്കും ദുര്‍ബല എതിരാളികളെയാണ് ലഭിച്ചത്. ബാസലാണ് ഗെര്‍ഡിയോളയുടെ സംഘത്തെ അവസാന പതിനാറില്‍ നേരിടുന്നത്. ഇറ്റാലിയന്‍ കരുത്തരായ റോമയ്ക്കും കാര്യങ്ങള്‍ കുറേ എളുപ്പമാണ്. ഷാക്തര്‍ ഡൊനെട്‌സ്‌കാണ് അവരുടെ പ്രീ ക്വാര്‍ട്ടര്‍ എതിരാളികള്‍.
2018 ഫെബ്രുവരി, മാര്‍ച്ച് മാസങ്ങളിലായാണ് പ്രീ ക്വാര്‍ട്ടര്‍ അരങ്ങേറുന്നത്. ഫെബ്രുവരി 13, 14, 20, 21 തിയതികളിലായി ഒന്നാം പാദ മത്സരങ്ങള്‍ നടക്കും. മാര്‍ച്ച് ആറ്, ഏഴ്, 13, 14 തിയതികളിലായി രണ്ടാം പാദ പോരാട്ടങ്ങളും അരങ്ങേറും.