ഗ്ലാസ്‌ഗോ: ഫലസ്തീന്‍ ജനതയ്ക്ക് ഐക്യദാര്‍ഢ്യവുമായി പ്രമുഖ യൂറോപ്യന്‍ ഫുട്‌ബോള്‍ ക്ലബായ സെല്‍റ്റിക് എഫ്.സിയുടെ പ്രേമികള്‍ വീണ്ടും. എഡിന്‍ബര്‍ഗിലെ ഈസ്റ്റര്‍ റോഡ് സ്റ്റേഡിയത്തില്‍ കഴിഞ്ഞ ദിവസം നടന്ന ക്ലബിന്റെ മത്സരത്തിലാണ് കളിപ്രേമികള്‍ ജറൂസലം വിഷയത്തില്‍ ട്രംപിന്റെ പ്രഖ്യാപനത്തില്‍ പ്രതിഷേധിച്ച് ഗാലറിയില്‍ ബാനര്‍ ഉയര്‍ത്തിയത്.
'ജറൂസലം ഈസ് ഫലസ്തീന്‍, ഫക്ക് ട്രംപ് ' എന്ന വാചകങ്ങളോടെയുള്ള പ്ലക്കാര്‍ഡുകളും ഫലസ്തീന്‍ പതാകകളുമായി കളി തുടങ്ങുന്നതിനു മുന്‍പു തന്നെ കാണികള്‍ ഗാലറിയില്‍ ഇരിപ്പുറപ്പിച്ചിരുന്നു. ഇതാദ്യമായല്ല ക്ലബ് പ്രേമികള്‍ ഫലസ്തീനോട് ഐക്യദാര്‍ഢ്യം പ്രകടിപ്പിക്കുന്നത്. കഴിഞ്ഞ വര്‍ഷം നടന്ന യുവേഫ ടൂര്‍ണമെന്റില്‍ ഇസ്‌റാഈല്‍ ക്ലബിനെതിരായ മത്സരത്തില്‍ കാണികള്‍ ഫലസ്തീന്‍ കൊടികള്‍ ഉയര്‍ത്തി പ്രതിഷേധിച്ചിരുന്നു. ഇതേതുടര്‍ന്ന് സെല്‍റ്റിക്ക് ക്ലബിന് യുവേഫ 82,000 യൂറോ ഫൈന്‍ ചുമത്തുകയും ചെയ്തിരുന്നു. എന്നാല്‍, ഫലസ്തീനു വേണ്ടി 1,60,000 യൂറോ സംഭാവനയായി പിരിച്ചാണ് കാണികള്‍ ഇതിനു മറുപടി നല്‍കിയത്. ബത്‌ലഹേമിലെ അഭയാര്‍ഥി ക്യാംപില്‍ കഴിയുന്ന ഫലസ്തീനികള്‍ ഇതിലേക്ക് വലിയൊരു സംഖ്യ സംഭാവന ചെയ്തിരുന്നു.