പെരിന്തല്‍മണ്ണ: വേട്ടയാടിയതെന്ന് സംശയിക്കുന്ന ആനക്കൊമ്പുമായി നാലംഗ സംഘത്തെ പെരിന്തല്‍മണ്ണയില്‍ പ്രത്യേക അന്വേഷണ സംഘം അറസ്റ്റ് ചെയ്തു.
പാലക്കാട് ജില്ലയിലെ അഗളി ചിറ്റൂര്‍ വെങ്ങക്കടവ് സ്വദേശി സുബ്രഹ്മണ്യന്‍ (51), മണ്ണാര്‍ക്കാട് പള്ളിക്കുറുപ്പ് കോഴിശ്ശേരി വീട്ടില്‍ അശ്‌റഫ് (46), കോയമ്പത്തൂര്‍ പെരിനായ്ക്കപ്പാളയം പാലമട കോളനിയിലെ വീരഭദ്രന്‍ (32), രംഗസ്വാമി (57) എന്നിവരാണ് അറസ്റ്റിലായത്.
രഹസ്യ വിവരത്തെ തുടര്‍ന്ന് പെരിന്തല്‍മണ്ണ ഡിവൈ.എസ്.പി എന്‍.പി മോഹനചന്ദ്രന്റെ നേതൃത്വത്തിലുള്ള സംഘം കഴിഞ്ഞ ചൊവ്വാഴ്ച രാത്രി ഒന്‍പതോടെ നടത്തിയ പട്രോളിങിനിടെ പെരിന്തല്‍മണ്ണ ബൈപാസ് റോഡില്‍ വച്ചാണ് വില്‍പനക്കായി കൊണ്ടുവന്ന ആനക്കൊമ്പുകളുമായി പ്രതികള്‍ വലയിലായത്. പെരിന്തല്‍മണ്ണ തൂത സ്വദേശിക്ക് വില്‍പ്പന നടത്തുന്നതിനായാണ് പ്രതികള്‍ കോയമ്പത്തൂര്‍ പെരിനായ്ക്കപ്പാളയം പാലമട കോളനിയില്‍ നിന്ന് ആനക്കൊമ്പുകള്‍ ഇവിടെയെത്തിച്ചത്.
തൂത സ്വദേശി ഇവയ്ക്ക് ഏകദേശം ഏഴുലക്ഷം രൂപയോളം വിലപറഞ്ഞതായും പ്രതികള്‍ അന്വേഷണ സംഘത്തോട് പറഞ്ഞു. കോയമ്പത്തൂരില്‍ നിന്ന് ആദ്യം മണ്ണാര്‍ക്കാട്ടെ ഒരു വീട്ടിലെത്തിച്ച ശേഷം വില്‍പനക്കായി പെരിന്തല്‍മണ്ണയിലേക്ക് കൊണ്ടുവരുന്നതിനിടെയാണ് ഇവര്‍ പിടിയിലായത് . പ്രതികളെ വിശദമായി ചോദ്യം ചെയ്യുന്നതിനും കേസിന്റെ തുടരന്വേഷണത്തിനുമായി വനം വകുപ്പിന് കൈമാറുമെന്ന് പൊലിസ് പറഞ്ഞു.
പെരിന്തല്‍മണ്ണ സി.ഐ. ടി.എസ് ബിനു മൂത്തേടം, എസ്.ഐ വി.കെ.കമറുദ്ദീന്‍, ജൂനിയര്‍ എസ്.ഐ. എംബി.രാജേഷ്, ടൗണ്‍ ഷാഡോ ഉദ്യോഗസ്ഥരായ പി.എന്‍.മോഹനകൃഷ്ണന്‍, എന്‍.ടി.കൃഷ്ണകുമാര്‍, എം.മനോജ്കുമാര്‍, സി.പി.മുരളി, എസ്.സുമേഷ്, പി.അനീഷ്, അജീഷ് ചെറുകോട്, ജയന്‍, വനിതാ സി.പി.ഒ സ്മിത, ജയമാണി എന്നിവരടങ്ങുന്ന സംഘമാണ് പ്രതികളെ അറസ്റ്റ് ചെയ്തത്.