പട്‌ന: സഹോദര ഭാര്യയെ വിവാഹം ചെയ്യാന്‍ ബന്ധുക്കളും ഗ്രാമവാസികളും നിര്‍ബന്ധിച്ചതിനെ തുടര്‍ന്ന് ഒന്‍പതാം ക്ലാസുകാരന്‍ ആത്മഹത്യ ചെയ്തു. 15 വയസുകാരനായ മഹാദേവ് ദാസ് ആണ് ആത്മഹത്യ ചെയ്തത്.ഈ കുട്ടിയേക്കാള്‍ 25 വയസ് പ്രായമുള്ള സഹോദര ഭാര്യ റൂബി ദേവിയെ വിവാഹം കഴിക്കാനാണ് നിര്‍ബന്ധിച്ചത്. രണ്ടുകുട്ടികളുടെ മാതാവാണ് യുവതി. സഹോദരന്‍ മരിച്ചതോടെ ഇവര്‍ക്ക് മറ്റൊരു ഭര്‍ത്താവ് വേണമെന്ന് ആവശ്യപ്പെട്ടാണ് 15 വയസുകാരനെകൊണ്ട് വിവാഹം കഴിപ്പിക്കാന്‍ സമ്മര്‍ദമുണ്ടായത്. സംസ്ഥാനത്ത് ശൈശവ വിവാഹവും സ്ത്രീധനം വാങ്ങിക്കുന്നതും കര്‍ശനമായി നിരോധിച്ചുകൊണ്ട് സര്‍ക്കാര്‍ ഉത്തരവിട്ടതിനു പിന്നാലെയാണ് ഇത്തരമൊരു സംഭവമുണ്ടായത്. സംസ്ഥാനത്തെ ഗയക്കടുത്ത പരൈയ്യയിലെ സര്‍ക്കാര്‍ സ്‌കൂളില്‍ ഒന്‍പതാം ക്ലാസിലാണ് കുട്ടി പഠിക്കുന്നത്. സംഭവത്തില്‍ പൊലിസ് കേസെടുത്തിട്ടുണ്ട്.