മാനന്തവാടി: നിലമ്പൂര്‍ കാട്ടില്‍ പൊലിസ് വെടിയേറ്റ് മരണപ്പെട്ട മാവോയിസ്റ്റുകളായ കുപ്പുദേവരാജ്, അജിത എന്നിവരെയും കാട്ടാനയുടെ ആക്രമണത്തില്‍ മരണപ്പെട്ട ലത(മീര) എന്നിവരെയും അനുസ്മരിക്കാന്‍ ഇന്ന് വൈകുന്നേരം ഗാന്ധിപാര്‍ക്കില്‍ രക്തസാക്ഷി അനുസ്മരണം നടക്കും. അരുവിക്കല്‍ കൃഷ്ണന്‍, പി.പി ഷാന്റോലാല്‍, എ വാസു, എം.എന്‍ രാവുണ്ണി എന്നിവരുള്‍പ്പെടുന്ന സമിതിയാണ് രക്തസാക്ഷി അനുസ്മരണം സംഘടിപ്പിച്ചിരിക്കുന്നത്. എന്നാല്‍ ഇതിനിടെ ഇന്ന് നടക്കുന്ന അനുസ്മരണം ബഹിഷ്‌കരിക്കുവാനും നക്‌സല്‍ബാരി സഖാക്കളെ കൊന്നൊടുക്കുന്ന മാവോയിസ്റ്റുകളെ തിരിച്ചറിയണമെന്നും ആവശ്യപ്പെട്ട് മാനന്തവാടി ടൗണിന്റെ വിവധ ഭാഗങ്ങളില്‍ പോസ്റ്ററുകള്‍ പ്രത്യക്ഷപ്പെട്ടു. ഇന്നെലെ രാവിലെയാണ് ഗാന്ധിപാര്‍ക്കിലും മൈസൂര്‍ റോഡിലും നേരത്തെ പതിച്ച അനുസ്മരണ പോസ്റ്ററുകള്‍ക്ക് മുകളിലായി ബഹിഷ്‌കരണ പോസ്റ്റര്‍ കണ്ടെത്തിയത്. കുപ്പുദേവരാജിനെയും അജിതയെയും ഒറ്റുകൊടുത്തതാണെന്നും മുമ്പ് സിനോജിനെ കൊലപ്പെടുത്തിയപോലെ ലതയെയും കൊന്നതാണെന്നും പോസ്റ്ററുകളില്‍ സൂചിപ്പിക്കുന്നുണ്ട്. തോക്ക് പൊട്ടിയും ആനചവിട്ടിയും കൊല്ലപ്പെടുന്നത് നക്‌സല്‍ബാരി സഖാക്കള്‍ മാത്രമാണെന്നും ഒറ്റുകാരാല്‍ നടത്തുന്ന അനുസ്മരണം ബൂര്‍ഷ്വാസികള്‍ക്ക് വേണ്ടിയാണെന്നും പോസ്റ്ററുകളില്‍ ആരോപിക്കുന്നു. നക്‌സല്‍ബാരി സഖാക്കള്‍ എന്നപേരിലാണ് പോസ്റ്ററുകള്‍ എഴുതി ഒട്ടിച്ചത്.
എന്നാല്‍ അഡ്രസില്ലാത്ത സംഘടനയുടെ പേരിലുള്ള പോസ്റ്ററുകള്‍ അപലപനീയമാണെന്നും അനുസ്മരണ പോസ്റ്ററുകള്‍ക്ക് മുകളില്‍ പതിച്ചത് ജനാധിപത്യ വിരുദ്ധമാണെന്നും സംഘാടകസമിതി ഭാരവാഹികളായ അരുവിക്കല്‍ കൃഷ്ണന്‍, പി.പി ഷാന്റോലാല്‍ എന്നിവര്‍ പ്രസ്താവനയിലുടെ അറിയിച്ചു.
ആന്ധ്രയിലെ വിപ്ലവരജയ്തലു സംഘം സെക്രട്ടറി പ്രൊഫ. വരലക്ഷ്മിയാണ് അനുസ്മരണ സമ്മേളനം ഉദ്ഘാടനം ചെയ്യുന്നത്. അതിനിടെ അനുസ്മരണ പരിപാടിയുടെ പോസ്റ്ററുകള്‍ കുഞ്ഞോത്തും പ്രത്യക്ഷപ്പെട്ടിട്ടുണ്ട്.