ഭോപ്പാല്‍: അംഗീകാരം നഷ്ടപ്പെടാതിരിക്കാന്‍ ആശുപത്രിയില്‍ വ്യാജരോഗികളെ നിറച്ച ആശുപത്രിയെ കുറിച്ച് അന്വേഷിക്കാന്‍ സുപ്രിം കോടതി ഉത്തരവ്. എസ് എ ബോബ്‌ഡെ, എല്‍ നാഗേശ്വര റാവു എന്നിവരുള്‍പ്പെട്ട ബെഞ്ചാണ് ഉത്തരവിട്ടത്.

ഇതിനായി സി.ബി.ഐ ഉദ്യോഗസ്ഥനും എയിംസിലെ രണ്ട് ഡോക്ടര്‍മാരും ഉള്‍പ്പെട്ട സംഘത്തെ നിയോഗിച്ചിട്ടുണ്ട്. രോഗികളുടെ മെഡിക്കല്‍ ഹിസ്റ്ററി, ശുശ്രൂഷ, ആശുപത്രിയില്‍ അഡ്മിറ്റ് ചെയ്യേണ്ട ആവശ്യം തുടങ്ങിയ കാര്യങ്ങള്‍ സംഘം പരിശോധിക്കും.

ഭോപ്പാലിലെ എസ്. രാധാകൃഷ്ണന്‍ യൂണിവേഴ്‌സിറ്റി മെഡിക്കല്‍ കോളജിനെതിരെയാണ് ആരോപണം. കേന്ദ്രസര്‍ക്കാരിന്റെയും മെഡിക്കല്‍ കൗണ്‍സില്‍ ഓഫ് ഇന്ത്യയുടെയും പരാതിയെത്തുടര്‍ന്നാണ് സുപ്രിംകോടതി പ്രത്യേക സംഘത്തെ നിയോഗിച്ചത്. അന്വേഷണം മൂന്ന് മാസത്തിനുള്ളില്‍ പൂര്‍ത്തിയാക്കണമെന്ന് കോടതി നിര്‍ദേശിച്ചിട്ടുണ്ട്.

എയിംസ് നടത്തിയ ദ്രുതപരിശോധനയില്‍ ആശുപത്രിയിലെ 410 ബെഡ്ഡുകള്‍ നിറയ്ക്കാന്‍ വ്യാജ രോഗികളെ പ്രവേശിപ്പിച്ചിട്ടുണ്ടെന്നത് ശ്രദ്ധയില്‍പ്പെട്ടിരുന്നു. ഒരു യൂണിറ്റ് രക്തം പോലും ഇന്‍സ്‌പെക്ഷന്‍ ദിനം ആശുപത്രി ഉപയോഗിച്ചിട്ടില്ലെന്നും ഡോക്ടര്‍മാര്‍ ആശുപത്രിയില്‍ ഹാജരായിരുന്നില്ലെന്നും അന്വേഷണത്തില്‍ കണ്ടെത്തി.

2017-18 അക്കാദമിക വര്‍ഷത്തില്‍ മെഡിക്കല്‍ വിദ്യാര്‍ഥികള്‍ക്ക് പ്രവേശനം നല്‍കിയതിലും തിരിമറികള്‍ നടന്നിട്ടുണ്ടെന്ന് അഡീഷണല്‍ സോളിസിറ്റര്‍ ജനറല്‍ എന്‍എസ് നദ്കര്‍ണി ചൂണ്ടിക്കാട്ടിയിരുന്നു.