കൊച്ചി: വ്യാജ രേഖയുണ്ടാക്കി പുതുച്ചേരിയില്‍ വാഹനം രജിസ്റ്റര്‍ ചെയ്ത കേസില്‍ നടനും രാജ്യസഭാംഗവുമായ സുരേഷ് ഗോപിയെ അറസ്റ്റ് ചെയ്യുന്നത് ഹൈക്കോടതി മൂന്നാഴ്ചത്തേക്ക് തടഞ്ഞു.
ഡിസംബര്‍ 21ന് രാവിലെ 10.15ന് സുരേഷ് ഗോപി ക്രൈംബ്രാഞ്ച് അന്വേഷണ ഉദ്യോഗസ്ഥന്‍ മുന്‍പാകെ ഹാജരാകണമെന്നും കൂടുതല്‍ ചോദ്യംചെയ്യണമെങ്കില്‍ മുന്‍കൂര്‍ നോട്ടിസ് നല്‍കി വിളിച്ചുവരുത്താമെന്നും ഹൈക്കോടതി വ്യക്തമാക്കി. ഹരജി പരിഗണിക്കവെ സുരേഷ് ഗോപി വ്യാജ രേഖയുപയോഗിച്ചാണ് വാഹനം പുതുച്ചേരിയില്‍ രജിസ്റ്റര്‍ ചെയ്തതെന്ന് പ്രോസിക്യൂഷന്‍ വ്യക്തമാക്കി.
സുരേഷ് ഗോപി ഹാജരാക്കിയ സത്യവാങ്മൂലത്തിലുള്ള നോട്ടറിയുടെ ഒപ്പ് വ്യാജമാണെന്ന് അന്വേഷണത്തില്‍ കണ്ടെത്തിയിരുന്നു.
ഇത്തരമൊരു സത്യവാങ്മൂലം സാക്ഷ്യപ്പെടുത്തിയിട്ടില്ലെന്ന് നോട്ടറി മൊഴിനല്‍കിയിട്ടുണ്ട്. പുതുച്ചേരിയില്‍ വാഹനം രജിസ്റ്റര്‍ ചെയ്യാന്‍ നല്‍കിയ വിലാസമുള്ള താമസസ്ഥലത്ത് സുരേഷ് ഗോപിയെ കണ്ടിട്ടില്ലെന്ന് സെക്യൂരിറ്റി ജീവനക്കാരും അയല്‍ക്കാരും വ്യക്തമാക്കിയിട്ടുണ്ട്.
എന്നാല്‍, പുതുച്ചേരിയില്‍ രജിസ്റ്റര്‍ചെയ്ത തന്റെ കാറുകള്‍ കേരളത്തില്‍ സ്ഥിരമായി ഓടുന്നില്ലെന്നും ഒന്ന് ഡല്‍ഹിയിലും മറ്റൊന്ന് ബംഗളൂരുവിലുമാണെന്നും സുരേഷ് ഗോപി നല്‍കിയ ഹരജിയില്‍ പറയുന്നു.