ന്യൂഡല്‍ഹി: ജറൂസലം ഇസ്‌റാഈല്‍ തലസ്ഥാനമായി യു.എസ് അംഗീകരിച്ചതില്‍ ഇന്ത്യ അപലപിക്കാത്തതില്‍ ഉത്കണ്ഠ പ്രകടിപ്പിച്ച് ഇന്ത്യയിലെ അറബ് രാഷ്ട്ര പ്രതിനിധികള്‍. ട്രംപിന്റെ തീരുമാനത്തിനെതിരേ ഇന്ത്യ ശക്തമയി പ്രതികരിക്കണമെന്ന് അറബ് പ്രതിനിധികള്‍ കേന്ദ്ര മന്ത്രിമാര്‍ ഉള്‍പ്പെടെയുള്ളവരോട് ആവശ്യപ്പെട്ടു. വിദേശകാര്യ മന്ത്രി എം.ജെ അക്ബറുമായി കൂടിക്കാഴ്ച നടത്തിയ പ്രതിനിധികള്‍ തങ്ങളുടെ ഉത്കണ്ഠ പങ്കുവച്ചു. സംഭവവുമായി ബന്ധപ്പെട്ട് സഊദി അറേബ്യന്‍ അംബാസഡര്‍ സഊദ് ബിന്‍ മുഹമ്മദ് അല്‍ സതിയുടെ നേതൃത്വത്തിലുള്ള വിവിധ അറബ് രാഷ്ട്രങ്ങളിലെ പ്രതിനിധികള്‍ സംസ്ഥാന, കേന്ദ്ര സര്‍ക്കാര്‍ പ്രതിനിധികളുമായി ചര്‍ച്ച നടത്തി. സുദാന്‍, അള്‍ജീരിയ, ഈജിപ്ത്, മൊറോക്കോ, ഇറാഖ്, തുനീഷ്യ, യു.എ.ഇ എന്നീ രാജ്യങ്ങളിലെ പ്രതിനിധികളാണ് ചര്‍ച്ചയില്‍ പങ്കെടുത്തത്.ഫലസ്തീന്‍ ഇസ്‌റാഈല്‍ വിഷയത്തില്‍ ഇന്ത്യ മൂന്നാം രാജ്യമാണെന്നും അതിനാല്‍ ഏതെങ്കിലും പക്ഷത്തോടുള്ള നിലപാടുകള്‍ സ്വീകരിക്കാനില്ലെന്നും ഇന്ത്യന്‍ ഔദ്യോഗിക വൃത്തങ്ങള്‍ അറേബ്യന്‍ പ്രതിനിധികളെ അറിയിച്ചു.
ട്രംപിന്റെ പ്രഖ്യാപനത്തിന് ശേഷം ഫലസ്തീനെ പിന്തുണക്കുന്ന അഭിപ്രായങ്ങള്‍ ഇന്ത്യന്‍ വിദേശകാര്യ വക്താവ് രവീഷ് കുമാര്‍നടത്തിയിരുന്നു. ഫലസ്തീന്‍ സ്വതന്ത്രവും സ്ഥിരതയുള്ളതുമായ രാഷ്ട്രമാണെന്നാണ് ഇന്ത്യയുടെ നിലപാടെന്നും ഇത് ഏതെങ്കിലും മൂന്നാം രാജ്യത്തിന്റെ തീരുമാനമല്ലെന്നും രവീഷ് കുമാര്‍ പറഞ്ഞിരുന്നു.
എന്നാല്‍ ട്രംപിന്റെ തീരുമാനത്തെ അപലപിക്കാത്ത ഇന്ത്യയുടെ നിലപാട് നിരാശപ്പെടുത്തിയെന്ന് ഇന്ത്യന്‍ അധികൃതരുമായുള്ള ചര്‍ച്ചയില്‍ പങ്കെടുത്ത അറബ് അംബാസഡര്‍ മാധ്യമങ്ങളോട് പറഞ്ഞു. ട്രംപിനെതിരേ ഇന്ത്യ ശക്തമായ പ്രസ്താവന നടത്തണമെന്ന് സര്‍ക്കാര്‍ പ്രതിനിധികളോട് ആവശ്യപ്പെട്ടെന്നും അദ്ദേഹം പറഞ്ഞു.
ഫലസ്തീന് ഐക്യദാര്‍ഢ്യം പ്രകടിപ്പിക്കുന്ന അന്താരാഷ്ട്ര ദിനമായ നവംബര്‍ 25ന് പ്രധാനമന്ത്രി നരേന്ദ്ര മോദി ഫലസ്തീന് എല്ലാവിധ പിന്തുണയും പ്രഖ്യാപിച്ചിരുന്നു. എന്നാല്‍ ട്രംപിന്റെ ജറൂസലം പ്രഖ്യാപനത്തെ സംബന്ധിച്ച് മോദി ഇതുവരെ പ്രതികരിച്ചിട്ടില്ല. യു.കെ, ഫ്രാന്‍സ്, ജര്‍മനി ഉള്‍പ്പെടെയുള്ള നിരവധി രാജ്യങ്ങള്‍ യു.എസ് പ്രഖ്യാപനത്തെ ശക്തമായി അപലപിച്ചിട്ടുണ്ട്.