റാഞ്ചി: സീനിയര്‍ വനിതാ ഏകദിന ലീഗ് ക്രിക്കറ്റ് പോരാട്ടത്തില്‍ കേരളം നോക്കൗട്ടില്‍. അവസാന മത്സരത്തില്‍ ജാര്‍ഖണ്ഡിനെ അഞ്ച് വിക്കറ്റിന് കീഴടക്കിയാണ് കേരളത്തിന്റെ വനിതകള്‍ നോക്കൗട്ടിലേക്ക് പ്രവേശിച്ചത്. നോക്കൗട്ടില്‍ ഗോവയുമായി ഈ മാസം 21ന് കേരളം ഏറ്റുമുട്ടും. ലീഗ് റൗണ്ടില്‍ നാലില്‍ മൂന്ന് മത്സരങ്ങളും വിജയിച്ചാണ് കേരളത്തിന്റെ മുന്നേറ്റം. അസം, ഗുജറാത്ത് ടീമുകളോട് വിജയിച്ച കേരളം വിദര്‍ഭയോട് മാത്രമാണ് പരാജയപ്പെട്ടത്.
ജാര്‍ഖണ്ഡുമായുള്ള അവസാന പോരാട്ടത്തില്‍ അനായാസ വിജയമാണ് കേരളം സ്വന്തമാക്കിയത്. ക്യാപ്റ്റന്‍ ആശ എസിന്റെ ഓള്‍റൗണ്ട് പ്രകടനമാണ് കേരളത്തിന് വിജയം സമ്മാനിക്കുന്നതില്‍ നിര്‍ണായകമായത്. ആദ്യം ബാറ്റ് ചെയ്ത ജാര്‍ഖണ്ഡിന്റെ പോരാട്ടം വെറും 131 റണ്‍സില്‍ അവസാനിപ്പിച്ച കേരളം അഞ്ച് വിക്കറ്റ് നഷ്ടത്തില്‍ 137 റണ്‍സെടുത്ത് വിജയം പിടിക്കുകയായിരുന്നു. ആശ എസ് പുറത്താകാതെ 43 റണ്‍സുമായി മുന്നില്‍ നിന്ന് നയിച്ചു.
വാലറ്റത്ത് മിന്നു മണി 21 റണ്‍സുമായി ക്യാപ്റ്റന് ഉറച്ച പിന്തുണ നല്‍കി. നേരത്തെ നാല് വിക്കറ്റുകള്‍ വീഴ്ത്തി ആശ ജാര്‍ഖണ്ഡിനെ കുറഞ്ഞ സ്‌കോറില്‍ പുറത്താക്കുന്നതില്‍ നിര്‍ണായക സാന്നിധ്യമായിരുന്നു. കീര്‍ത്തി ജെയിംസ് മൂന്ന് വിക്കറ്റുകള്‍ പിഴുതു.