കാരക്കുന്ന്: തൃക്കലങ്ങോട് ചിറമ്മല്‍ പാടത്ത് ദേശാടനകൊക്കുകള്‍ വിരുന്നെത്തി. ഒക്ടോബര്‍ മുതല്‍ ഏപ്രില്‍ വരെയുള്ള മാസങ്ങളിലാണ് വിവിധ രാജ്യങ്ങളില്‍ നിന്നും ദേശാടനപക്ഷികള്‍ വിരുന്നെത്തുന്നത്. ആദ്യകാലങ്ങളില്‍ കൂട്ടമായി എത്താറുണ്ടെങ്കിലും കേരളത്തിലെ വരള്‍ച്ചയും ചൂടും കടലിലെ ന്യൂനമര്‍ദവും കാറ്റിന്റെ ദിശമാറ്റവും വടക്കേ ഇന്ത്യയിലെ കാലാവസ്ഥാ മാറ്റവും കാരണം പക്ഷികളുടെ വരവ് കുറഞ്ഞു.

മഞ്ഞുകാലങ്ങളില്‍ കാര്‍ഷിക മേഖലയില്‍ കൃത്യമായെത്തുന്ന സൈബീരിയന്‍ കൊക്കുകളെയാണ് കഴിഞ്ഞ ദിവസം ചെറമ്മല്‍ പാടത്ത് കാണപ്പെട്ടത്. കാലാവസ്ഥക്കനുസൃതമായാണ് ഇവ സഞ്ചരിക്കുന്നത്. പതിനായിരകണക്കിന് കിലോമീറ്റര്‍ താണ്ടിയാണ് ഇവ ഇവിടെ എത്തുന്നത്.