കൊച്ചി: എ.ഐ.ഐ.എഫ് അണ്ടര്‍ 15 യൂത്ത് ഫുട്‌ബോള്‍ ലീഗിന്റെ ഗ്രൂപ്പ് ഇ മത്സരത്തില്‍ എം.എസ്.പിക്കും ഡോണ്‍ ബോസ്‌കോയ്ക്കും ജയം. കോവളം എഫ്.സിക്കെതിരേ ഗോള്‍ മഴ തീര്‍ത്താണ് എം.എസ്.പി (എം.എഫ്.എ ഫുട്‌ബോള്‍ അക്കാദമി) വിജയം നേടിയത്. മറുപടിയില്ലാത്ത അഞ്ച് ഗോളുകള്‍ക്കായിരുന്നു എം.എസ്.പിയുടെ ജയം. ഷഹാന്‍ സലീം രണ്ട് ഗോള്‍ (24, 87 മിനുട്ട്) നേടിയപ്പോള്‍ വിപിന്‍ മോഹന്‍, പി. അഭിജിത്ത്, കെ.എച്ച് ഹഫീം എന്നിവര്‍ ഓരോ ഗോള്‍ നേടി.
പ്രൊഡിജി സ്‌പോര്‍ട്‌സിനെ ഒന്നിനെതിരേ രണ്ട് ഗോളുകള്‍ക്ക് ഡോണ്‍ ബോസ്‌കോ ഫുട്‌ബോള്‍ അക്കാദമി പരാജയപ്പെടുത്തി. നാലാം മിനുട്ടില്‍ പ്രൊഡിജിക്കായി ഹാഫിസ് റഹ്മാനാണ് ആദ്യം ഗോള്‍ നേടിയത്. രണ്ടാം പകുതിയിലായിരുന്നു ഡോണ്‍ ബോസ്‌കോയുടെ മറുപടി ഗോളുകള്‍. 61ാം മിനുട്ടില്‍ പി ഹിജാസും 79ാം മിനുട്ടില്‍ മുഹമ്മദ് അയ്‌മെനും വല കുലുക്കി.