ന്യൂഡല്‍ഹി: ലഖ്‌നൗ-ആഗ്ര എക്‌സ്പ്രസ് വേയില്‍ നിര്‍ത്തിയിട്ടിരുന്ന ലോറിയ്ക്കു പിന്നില്‍ 12 കാറുകള്‍ കൂട്ടിയിടിച്ച് രണ്ട് പേര്‍ മരിച്ചു. നിരവധി പേര്‍ക്ക് പരുക്കേറ്റിട്ടുണ്ട്. വ്യാഴാഴ്ച്ച രാവിലെയാണ് അപകടമുണ്ടായത്. ദീപക് (32) സുമിത(34) എന്നിവരാണ് മരിച്ചത്.

കനത്ത പുകമഞ്ഞിനെ തുടര്‍ന്ന് റോഡിലെ ദൃശ്യപരിധി കുറഞ്ഞതാണ് അപകടത്തിന് കാരണമായത്. എഞ്ചിന്‍ തകരാറിനെ തുടര്‍ന്ന് റോഡില്‍ നിര്‍ത്തിയിട്ടതായിരുന്നു ലോറി. പിന്നിലെത്തിയ കാറിന്റെ ഡ്രൈവര്‍ക്ക് ലോറി നിര്‍ത്തിയിട്ടത് കാണാന്‍ സാധിച്ചിരുന്നില്ല. പിന്നാലെ വന്ന വാഹനങ്ങളെല്ലാം അപകടത്തില്‍പെടുകയായിരുന്നു.