തിരുവനന്തപുരം: ഡോക്ടര്‍മാരുടെ പെന്‍ഷന്‍ പ്രായം വര്‍ധിപ്പിച്ച തീരുമാനം പുനഃപരിശോധിക്കുമെന്ന് മന്ത്രി നല്‍കിയ ഉറപ്പ് പാലിക്കാത്തതില്‍ പ്രതിഷേധിച്ച് ഇന്നു മുതല്‍ സര്‍ക്കാര്‍ മെഡിക്കല്‍ കോളജുകളിലെ പി.ജി വിദ്യാര്‍ഥികളും ഹൗസ് സര്‍ജന്മാരും അനിശ്ചിതകാലത്തേക്ക് സമരം ആരംഭിക്കും. എം.ബി.ബി.എസ് വിദ്യാര്‍ഥികള്‍ പഠിപ്പുമുടക്കി സമരത്തില്‍ പങ്കുചേരും. അത്യാഹിത വിഭാഗം, ഐ.സി.യു, ലേബര്‍ റൂം എന്നിവയെ സമരത്തില്‍ നിന്ന് ഒഴിവാക്കിയിട്ടുണ്ട്. ഒഴിവുകള്‍ നികത്തുക, താല്‍ക്കാലിക നിയമനങ്ങള്‍ ഒഴിവാക്കുക തുടങ്ങിയവയാണ് മറ്റ് ആവശ്യങ്ങള്‍.
കഴിഞ്ഞ 22ന് സമരം ആരംഭിക്കാനായിരുന്നു തീരുമാനിച്ചിരുന്നത്. എന്നാല്‍ മന്ത്രി വിളിച്ചു ചേര്‍ത്ത ചര്‍ച്ചയില്‍ പെന്‍ഷന്‍ പ്രായം ഉയര്‍ത്തിയത് പുനഃപരിശോധിക്കാമെന്ന് ഉറപ്പ് നല്‍കിയിരുന്നു. എന്നാല്‍ ഉറപ്പ് പാലിച്ചില്ലെന്നും തുടര്‍ ചര്‍ച്ചയ്ക്ക് പോലും വിളിച്ചില്ലെന്നും മെഡിക്കല്‍ വിദ്യാര്‍ഥികള്‍ ആരോപിക്കുന്നു. ഇന്ന് സമരം ആരംഭിക്കുന്നതോടെ മെഡിക്കല്‍ കോളജുകളുടെ പ്രവര്‍ത്തനത്തെ ഇത് ബാധിക്കും.