ലണ്ടന്‍: ഇംഗ്ലീഷ് പ്രീമിയര്‍ ലീഗ് പോരാട്ടത്തില്‍ 18 തുടര്‍ വിജയങ്ങളുമായി പെപ് ഗെര്‍ഡിയോളയുടെ ടീം മാഞ്ചസ്റ്റര്‍ സിറ്റിയുടെ സ്വപ്നതുല്ല്യം മുന്നേറ്റം തുടരുന്നു. മറുപടിയില്ലാത്ത ഒറ്റ ഗോളിന് അവര്‍ ന്യൂകാസില്‍ യുനൈറ്റഡിനെ വീഴ്ത്തിയാണ് വിജയമാഘോഷിച്ചത്. 

20 മത്സരങ്ങളില്‍ നിന്ന് 58 പോയിന്റുമായി സിറ്റി ഒന്നാം സ്ഥാനത്ത് നില്‍ക്കുന്നു. രണ്ടാമതുള്ള മാഞ്ചസ്റ്റര്‍ യുനൈറ്റഡിന് ഇത്രയും മത്സരങ്ങളില്‍ നിന്ന് 43 പോയിന്റുകളാണുള്ളത്.
സിറ്റിയും യുനൈറ്റഡും തമ്മില്‍ 15 പോയിന്റിന്റെ വ്യക്തമായ ലീഡുണ്ട്. കിരീടം ഏതാണ്ടുറപ്പിച്ച് മുന്നേറുന്ന മാഞ്ചസ്റ്റര്‍ സിറ്റി ഈ വര്‍ഷത്തെ അവസാന പോരാട്ടത്തില്‍ ക്രിസ്റ്റല്‍ പാലസുമായി ഈ മാസം 31ന് പോരിനിറങ്ങും.
ആ മത്സരവും വിജയിച്ച് അപരാജിതരായി പുതു വത്സരത്തിലേക്ക് കടക്കാനായിരിക്കും സിറ്റി ലക്ഷ്യമിടുന്നത്. എവേ പോരാട്ടത്തിലാണ് സിറ്റി ക്രിസ്റ്റല്‍ പാലസിനെ നേരിടുന്നത്. ന്യൂകാസിലിനെതിരായ എവേ പോരാട്ടത്തില്‍ റഹിം സ്റ്റെര്‍ലിങ് നേടിയ ഗോളിലാണ് സിറ്റിയുടെ വിജയം.
കളിയുടെ 31ാം മിനുട്ടിലാണ് സ്റ്റെര്‍ലിങ് വല ചലിപ്പിച്ചത്. സീസണില്‍ സ്റ്റെര്‍ലിങ് നേടുന്ന 13ാം പ്രീമിയര്‍ ലീഗ് ഗോളാണിത്. ആദ്യ പകുതിയില്‍ ക്യാപ്റ്റന്‍ വിന്‍സെന്റ് കോംപനിക്ക് പരുക്കേറ്റ് പുറത്തുപോകേണ്ടി വന്നത് മാത്രമാണ് സിറ്റിക്ക് നിരാശയേകിയ ഘടകം. കെവിന്‍ ഡി ബ്രുയ്‌ന്റെ പാസില്‍ നിന്നാണ് സ്റ്റെര്‍ലിങിന്റെ വിജയ ഗോള്‍ പിറന്നത്.