ലണ്ടന്‍: ക്രിസ്റ്റല്‍ പാലസിനെതിരായ പോരാട്ടത്തിനായി ആഴ്‌സണല്‍ കളത്തിലിറങ്ങിയതോടെ ഒരപൂര്‍വ ബഹുമതി അവരുടെ പരിശീലകന്‍ ആഴ്‌സന്‍ വെങര്‍ സ്വന്തമാക്കി.
വിഖ്യാത കോച്ച് സര്‍ അലക്‌സ് ഫെര്‍ഗൂസന്‍ മാഞ്ചസ്റ്റര്‍ യുനൈറ്റഡിന്റെ അമരക്കാരനായിരിക്കേ കുറിച്ച റെക്കോര്‍ഡിനൊപ്പമെത്തിയാണ് വെങര്‍ താരമായത്.
ഇംഗ്ലീഷ് പ്രീമിയര്‍ ലീഗില്‍ ഒരു ടീമിനെ ഏറ്റവും കൂടുതല്‍ മത്സരങ്ങളില്‍ പരിശീലിപ്പിച്ചതിന്റെ, ഫെര്‍ഗൂസന്‍ സ്ഥാപിച്ച റെക്കോര്‍ഡിനൊപ്പമെത്തി വെങര്‍. ഫെര്‍ഗൂസന്‍ 810 പ്രീമിയര്‍ ലീഗ് മത്സരങ്ങളിലാണ് ടീമിനെ പരിശീലിപ്പിച്ചത്.
ക്രിസ്റ്റല്‍ പാലസിനെതിരായ പോരാട്ടത്തിനായി ആഴ്‌സണല്‍ ഇറങ്ങിയതോടെ വെങറും 810 എന്ന നമ്പറിലെത്തി. നാളെ വെസ്റ്റ് ബ്രോംവിചിനെതിരായ പോരാട്ടത്തിനായി ടീം ഇറങ്ങുന്നതോടെ റെക്കോര്‍ഡ് വെങര്‍ക്ക് ഒറ്റയ്ക്ക് സ്വന്തമാകും. 1996 മുതല്‍ ആഴ്‌സണലിന്റെ പരിശീലകനാണ് വെങര്‍.