മുംബൈ: ഐ.എസ്.എല്ലില്‍ ഡല്‍ഹി ഡൈനാമോസിന് തുടര്‍ച്ചയായ ആറാം തോല്‍വി. സ്വന്തം തട്ടകത്തില്‍ മുംബൈ സിറ്റി എഫ്.സി അവരെ മറുപടിയില്ലാത്ത നാല് ഗോളുകള്‍ക്ക് കീഴടക്കുകയായിരുന്നു. രണ്ട് ടീമിന്റേയും താരങ്ങള്‍ക്ക് ചുവപ്പ് കാര്‍ഡ് കണ്ട സംഭവബഹലുമായ പോരാട്ടത്തിലാണ് മുംബൈ വിജയം പിടിച്ചത്. മുംബൈയുടെ സെഹ്നജ് സിങും ഡല്‍ഹിയുടെ മത്യാസ് മിര്‍ബജെയുമാണ് ആദ്യ പകുതിയുടെ അവസാനത്തില്‍ ചുവപ്പ് കാര്‍ഡ് കണ്ടത്. മുംബൈക്കായി എവര്‍ടന്‍ സാന്റോസ് ഇരട്ട ഗോളുകളും ലൂസിയന്‍ ഗോയിന്‍, ബല്‍വന്ത് സിങ് എന്നിവരും വല ചലിപ്പിച്ചു.