കോഴിക്കോട്: നഗരത്തില്‍ ഭിന്നലിംഗക്കാര്‍ക്ക് മര്‍ദ്ദനമേറ്റ സംഭവത്തില്‍ കസബ എസ.്ഐയെ രക്ഷിക്കാന്‍ നീക്കം നടക്കുന്നതായി ആരോപണം. കസബ എസ്.ഐ വി ഷിജിത്തിനും മറ്റ് രണ്ട് പൊലിസുകാര്‍ക്കുമെതിരെ കേസെടുത്തെന്ന് പറയുന്നുണ്ടെങ്കിലും എഫ്.ഐ.ആറില്‍ എസ്‌ഐയുടെ പേരില്ലെന്നാണ് ആക്ഷേപം. ടൗണ്‍ പൊലിസ് രജിസ്റ്റര്‍ ചെയ്ത കേസിലെ എഫ്.ഐ.ആറിലുള്ളത് കണ്ടാലറിയാവുന്ന പൊലിസുകാര്‍ എന്ന് മാത്രമാണുള്ളത്.

എന്നാല്‍ മൊഴി നല്‍കിയപ്പോള്‍ കസബ എസ്.ഐയുടെ പേര് പറഞ്ഞിരുന്നുവെന്ന് പരുക്കേറ്റ ജാസ്മിന്‍ പറഞ്ഞു. കേസില്‍ ഇനിയും അഞ്ചു പേര്‍ കൂടിയുണ്ടെന്ന് പൊലിസ് വ്യക്തമാക്കി.സംഭവത്തില്‍ കുറ്റക്കാരായ പൊലിസുകാര്‍ക്കെതിരെ കേസെടുത്ത് അന്വേഷണം നടത്താന്‍ ഡി.ജി.പി ലോക്‌നാഥ് ബെഹ്‌റ ഉത്തരവിട്ടിരുന്നു.

സംസ്ഥാന തുടര്‍വിദ്യാഭ്യാസ കലോത്സവ പരിപാടികള്‍ കഴിഞ്ഞ് താമസസ്ഥലത്തക്കേു മടങ്ങവെ ബുധനാഴ്ച അര്‍ധരാത്രി 12.30ഓടെ മിഠായിതെരുവിന് സമീപം താജ് റോഡിലായിരുന്നു കേസിനാസ്പദമായ സംഭവം നടന്നത്. കോട്ടക്കടവ് സ്വദേശി സുസ്മി (42), അപ്‌സര തിയേറ്ററിനു സമീപം താമസിക്കുന്ന മമതാ ജാസ്മിന്‍ (47) എന്നിവര്‍ക്കാണു മര്‍ദനമേറ്റത്.