അറബിക്കടലില്‍ നിന്ന് ചരക്കുകപ്പല്‍ കടല്‍കൊള്ളക്കാര്‍ റാഞ്ചി; കപ്പലില്‍ 15 ഇന്ത്യക്കാര്‍, തെരച്ചില്‍ നടത്തുന്നതായി നാവികസേന

ന്യൂഡല്‍ഹി: സൊമാലിയന്‍ തീരത്തുനിന്ന് 15 ഇന്ത്യക്കാരടക്കമുള്ള ലൈബീരിയന്‍ കപ്പല്‍ തട്ടിക്കൊണ്ടുപോയി. കപ്പലിനായി തെരച്ചില്‍ തുടങ്ങിയതായി ഇന്ത്യന്‍ നാവികസേന അറിയിച്ചു. ലൈബീരിയന്‍ പതാകയുള്ള എ.വി ലില നോര്‍ഫോക് എന്ന ചരക്കുകപ്പലാണ് കൊള്ളക്കാര്‍ തട്ടിയെടുത്തത്. ഇന്നലെ വൈകീട്ടാണ് കപ്പല്‍ തട്ടിക്കൊണ്ടുപോയതായി സന്ദേശം ലഭിച്ചത്.

ഇന്ത്യന്‍ നാവികസേനയുടെ വിമാനങ്ങള്‍ നിരീക്ഷണം നടത്തുന്നുണ്ടെന്നും കപ്പലിലുണ്ടായിരുന്ന ജീവനക്കാരുമായി ആശയവിനിമയം നടത്തിയതായും സൈനിക വൃത്തങ്ങളെ ഉദ്ധരിച്ച് വാര്‍ത്താ ഏജന്‍സിയായ എ.എന്‍.ഐ ആണ് റിപ്പോര്‍ട്ട് ചെയ്തത്. കപ്പല്‍ ബ്രസീലിലെ പോര്‍ട്ടോ ഡു അക്യൂവില്‍ നിന്ന് ബഹ്‌റൈനിലെ ഖലീഫ ബിന്‍ സല്‍മാന്‍ തുറമുഖത്തേക്ക് പോകുകയായിരുന്നുവെന്ന് മറൈന്‍ ട്രാഫിക് അറിയിച്ചു.