42 കിലോമീറ്ററിലേറെ ദൂരവുമായി ദുബൈ മാരത്തൺ നാളെ; വിവിധ റോഡുകൾ അടച്ചിടുമെന്ന് ആർടിഎ

ദുബൈ: ലോക പ്രസിദ്ധമായ ദുബൈ മാരത്തൺ നാളെ നടക്കും. ഞായറാഴ്ച രാവിലെ 6 മുതൽ ഉച്ചക്ക് ഒരു മണിവരെയാണ് മാരത്തൺ നടക്കുക. ഈ സമയത്തിൽ എമിറേറ്റിലെ വിവിധ റോഡുകൾ അടച്ചിടുമെന്ന റോഡ്‌സ് ആൻഡ് ട്രാൻസ്‌പോർട്ട് അതോറിറ്റി (ആർ‌ടി‌എ) അറിയിച്ചു. ഉം സുഖീം, ജുമൈറ മേഖലകളിലെ റോഡുകളാകും അടക്കുക.

ഉം സുഖീം സ്ട്രീറ്റ്, ജുമൈറ ബീച്ച് റോഡ്, അൽ വാസൽ റോഡ് എന്നിവയുടെ ഭാഗങ്ങളിലുള്ള വിവിധ റോഡുകളാണ് അടക്കുക. മിഡിൽ ഈസ്റ്റിലെ ആദ്യത്തേതും ഏറ്റവും പഴക്കമുള്ളതുമായ അന്താരാഷ്‌ട്ര മാരത്തൺ ആണ് ദുബൈ മാരത്തൺ. 42.195 കിലോമീറ്റർ ദൂരം ആണ് മരത്തണിന്റെ ദൂരം. ദുബൈ പൊലിസ് അക്കാദമിക്ക് സമീപത്ത് നിന്നാണ് മാരത്തൺ ആരംഭിക്കുക. മത്സരാധിഷ്ഠിത മാരത്തണിന് പുറമെ, എലൈറ്റ്, അമേച്വർ ഓട്ടക്കാർ 10 കിലോമീറ്റർ വിഭാഗത്തിലും മത്സരിക്കും. അതേസമയം തുടക്കക്കാർക്കും ഹോബികൾക്കുമായി 4 കിലോമീറ്റർ രസകരമായ ഓട്ടവും ഒരുക്കിയിട്ടുണ്ട്.

ദുബൈ സ്‌പോർട്‌സ് കൗൺസിലിന്റെ അനുമതിയോടെ നടക്കുന്ന 2024ലെ ദുബൈ മാരത്തണിൽ അന്താരാഷ്‌ട്ര മുൻനിര അത്‌ലറ്റുകൾ, വളർന്നുവരുന്ന താരങ്ങൾ, അരങ്ങേറ്റ ഓട്ടക്കാർ തുടങ്ങിയവരുടെ പങ്കാളിത്തം ഉണ്ടാകും.