ശരീരത്തിന്റെ ആരോഗ്യം കാത്ത് സൂക്ഷിക്കാനും ശരീരത്തിന്റെ ഫിറ്റ്‌നസ്, ആകൃതി എന്നിവ നിലനിര്‍ത്താനും ജിമ്മില്‍ സമയം ചെലവഴിക്കുന്നവരുടെ എണ്ണം നാള്‍ക്കുനാള്‍ വര്‍ദ്ധിച്ച് വരുന്നതായാണ് കണക്കുകള്‍ സൂചിപ്പിക്കുന്നത്. എന്നാല്‍ ഫിറ്റ്‌നസ് സ്വന്തമാക്കാനായി ജിമ്മില്‍ ചെയ്യുന്ന കഠിനമായ വ്യായാമ മുറകളും ഭക്ഷണനിയന്ത്രണവും പുരുഷന്മാരില്‍ വന്ധ്യതക്ക് കാരണമാകുമെന്നാണ് പുതിയ പഠനങ്ങള്‍ പറയുന്നത്.

കൃത്യമായി ഒരു ട്രെയ്‌നറുടെ നേതൃത്ത്വത്തിലല്ലാതെ കഠിനമായ വ്യായാമങ്ങള്‍ ചെയ്യുന്ന പുരുഷന്മാര്‍ ശ്രദ്ധാലുക്കളാവണമെന്നാണ് ആരോഗ്യവിദഗ്ധര്‍ ചൂണ്ടിക്കാട്ടുന്നത്.കഠിനമായ വ്യായാമ മുറകളും, അമിതമായി ഭാരം ഉയര്‍ത്തുന്നതും കൂടാതെ അധിക സമയം വ്യായാമത്തിനായി ചെലവഴിക്കുന്നതുമൊക്കെ പുരുഷ ലൈംഗിക ഹോര്‍മോണായ ടെസ്‌റ്റോസ്റ്റിറോണിന്റെ അളവ് കുറയുന്നതിന് കാരണമാകുന്നു. അതിനാല്‍ തന്നെ വ്യായാമം ചെയ്യുന്ന സമയത്തിലും, കാഠിന്യത്തിലും എപ്പോഴും ശ്രദ്ധയുണ്ടാകണമെന്നും വിദഗ്ധര്‍ ചൂണ്ടിക്കാട്ടുന്നു.

കൂടാതെ മസില്‍ ഗെയിനുണ്ടാകുന്നതിനായി കഴിക്കുന്ന പ്രോട്ടീന്‍ സപ്ലിമെന്റുകള്‍ അധികമാകുന്നതും സ്‌പേം കൗണ്ട് കുറയുന്നതിന് ഇടയാകുന്നു. കൂടാതെ ടെസ്റ്റിക്കുലാര്‍ അസ്‌ട്രോഫി, ശീഘ്രസ്ഖലനം എന്നിവയ്ക്കും ഇത് കാരണമാകും. ഓക്‌സീകരണ സമ്മര്‍ദത്തിനു ദീര്‍ഘ നേരമുള്ള വ്യായാമം കാരണമാകുന്നതിനാലാണ് പുരുഷന്മാരിലെ പ്രത്യുല്‍പ്പാദന സാധ്യതയെ അമിത വ്യായാമം ദോഷകരമായി ബാധിക്കുന്നത്.

Content Highlights:extreme exercise affect fertility in men