പ്രത്യക്ഷ നികുതിയിൽ വർധനയുമായി കേരളം; രാജ്യത്തെ നികുതിയുടെ 65 ശതമാനവും മൂന്ന് സംസ്ഥാങ്ങളിൽ നിന്ന്

ന്യൂഡൽഹി: പ്രത്യക്ഷ നികുതിയിൽ (ഡയറക്ട് ടാക്സ്) വർധനയുമായി കേരളം. ആദായ നികുതി കണക്കുകൾ പ്രകാരം കഴിഞ്ഞ അഞ്ച് വർഷത്തിനിടെ കേരളത്തിൽ നിന്ന് കിട്ടിയ നികുതിയിൽ 45 ശതമാനം വർധനയാണ് രേഖപ്പെടുത്തിയത്. രാജ്യമാകെ ഇക്കാലയളവിൽ 65 ശതമാനത്തിന്റെ വർധനയുണ്ടായി.

പ്രത്യക്ഷനികുതി കലക‍്ഷൻ പട്ടികയിൽ അഞ്ച് വർഷമായി കേരളം 12–ാം സ്ഥാനത്താണ്. മഹാരാഷ്ട്ര, ഡൽഹി, കർണാടക എന്നീ സംസ്ഥാനങ്ങളാണ് ആദ്യ മൂന്ന് സ്ഥാനങ്ങളിൽ ഉള്ളത്. തമിഴ്നാടും ഗുജറാത്തുമാണ് നാലും അഞ്ചും സ്ഥാനങ്ങളിൽ ഉള്ളത്. മൊത്തം പ്രത്യക്ഷ നികുതിയുടെ 65 ശതമാനവും സംഭാവന ചെയ്യുന്നത് ആദ്യ മൂന്ന് സംസ്ഥാനങ്ങളിൽ നിന്ന് മാത്രമാണ്.

കേരളത്തിന്റെ വിഹിതം 1.44% മാത്രമാണ്. കേരളത്തിന്റെ നികുതി, 2017–18ൽ 16,427 കോടി രൂപയായിരുന്നെങ്കിൽ കഴിഞ്ഞ സാമ്പത്തിക വർ‌ഷത്തിൽ ഇത് 23,983 കോടിയായി ഉയർന്നു. ആദായനികുതിയും കോർപറേറ്റ് നികുതിയുമാണ് പ്രത്യക്ഷ നികുതിയുടെ നല്ല പങ്കും.

കഴിഞ്ഞ വർഷം 8.33 ലക്ഷം കോടി രൂപയാണ് രാജ്യമാകെ ആദായനികുതിയായി പിരിച്ചെടുത്തത്. കോർപറേറ്റ് നികുതി 8.25 ലക്ഷം കോടിയും. 2000ൽ ആദായനികുതി പിരിച്ചെടുത്ത് 31,764 കോടി രൂപ മാത്രമായിരുന്നു. 2013–14ൽ വ്യക്തിഗത നികുതിദാതാക്കൾ 4.95 കോടിയായിരുന്നെങ്കിൽ കഴിഞ്ഞ വർഷമിത് 8.9 കോടിയായി.