മൂന്ന് വർഷത്തിനുള്ളിൽ ഇന്ത്യ ലോകത്തിലെ മൂന്നാമത്തെ സാമ്പത്തിക ശക്തിയാകുമെന്ന് കേന്ദ്ര ധനമന്ത്രാലയത്തിന്റെ റിപ്പോർട്ട്

ന്യൂഡൽഹി: ഇന്ത്യ അടുത്ത മൂന്നു വർഷത്തിനകം ലോകത്തെ മൂന്നാമത്തെ വലിയ സമ്പദ്‍വ്യവസ്ഥയായി മാറുമെന്ന് കേന്ദ്ര ധനമന്ത്രാലയത്തിന്റെ സാമ്പത്തിക അവലോകന റിപ്പോർട്ട്. നിലവിൽ അഞ്ചാമതാണ് ഇന്ത്യ. യുഎസ്, ചൈന, ജർമനി, ജപ്പാൻ എന്നിവയാണ് സമ്പദ്‍വ്യവസ്ഥയിൽ മുന്നിലുള്ള രാജ്യങ്ങൾ. ഇതിൽ ജർമനിയെയും ജപ്പാനെയും മറികടന്ന് ഇന്ത്യ മുന്നിലെത്തുമെന്നാണ് പ്രവചനം. സാമ്പത്തിക വളർച്ച ഏഴ് ശതമാനം കൂടുമെന്നും കേന്ദ്ര ധനമന്ത്രാലയം അവകാശവാദമുന്നയിക്കുന്നു.

അഞ്ച് ലക്ഷം കോടി ഡോളർ മൂല്യമുള്ള സമ്പദ്‍വ്യവസ്ഥയായിരിക്കും മൂന്ന് വർഷത്തിന് ശേഷം ഉണ്ടാവുകയെന്നാണ് ധനമന്ത്രാലയത്തിന്റെ സാമ്പത്തിക അവലോകന റിപ്പോർട്ട് പറയുന്നു. തുടർന്ന് 2030ൽ അഞ്ച് ലക്ഷം കോടിയിൽ നിന്ന് ഏഴ് ലക്ഷം കോടി ഡോളറായി സമ്പദ്‌വ്യവസ്ഥ ഉയരുമെന്നും റിപ്പോർട്ടിൽ പറയുന്നു.

ഇക്കഴിഞ്ഞ മാർച്ചിൽ അവസാനിച്ച സാമ്പത്തികവർഷം രാജ്യത്തിന്റെ ജിഡിപി 272.41 ലക്ഷം കോടി രൂപയാണെന്നാണ് (3.3 ട്രില്യൻ ഡോളർ) കണക്കാക്കിയിരിക്കുന്നത്. ഇത് വരുന്ന മാർച്ചിൽ 301.75 ലക്ഷം കോടി രൂപയാകുമെന്നാണ് ബജറ്റ് വിലയിരുത്തൽ. ഏപ്രിൽ ഒന്നിന് ആരംഭിക്കുന്ന അടുത്ത സാമ്പത്തികവർഷവും ഇന്ത്യയുടെ സാമ്പത്തിക വളർച്ച ശതമാനം ശതമാനം കടക്കുമെന്നാണ് ധനമന്ത്രാലയത്തിന്റെ പ്രവചനം.