അഭയം തേടാന്‍ ഒരിടവും ശേഷിക്കാതെ ഫലസ്തീനികള്‍;അടുത്ത ആക്രണം ശേഷിക്കുന്ന അഭയകേന്ദ്രമായ റഫയിലേക്ക്

ഫലസ്തീന്‍ ജനതക്ക് അഭയം തേടാന്‍ ഇനി ഒരു തരി മണ്ണ് പോലും ശേഷിക്കുന്നില്ല അവിടെ. ഇനി ശേഷിക്കുന്ന അഭയ കേന്ദ്രമായ റഫയിലേക്കാ തങ്ങളുടെ ആക്രമണം അഴിച്ചു വിടാനുള്ള നീക്കത്തിലാണ് സയണിസ്റ്റ് ഭരണകൂടം.

അതിനിടെ, നേരത്തെ സുരക്ഷിത മേഖലയായി വിശേഷിപ്പിക്കപ്പെട്ട റഫയില്‍ ആക്രമണം അഴിച്ചു വിടുമെന്ന ഇസ്‌റാഈല്‍ പ്രതിരോധ മന്ത്രി പ്രഖ്യാപിച്ചത് ഗസ്സയില്‍ സ്ഥിതിഗതികള്‍ കൂടുതല്‍ പ്രതിസന്ധിയിലാക്കിയിരിക്കുകയാണ്. തെക്കന്‍ ഗസ്സയിലെ റഫ ഭാഗത്ത് കരയാക്രമണം ശക്തമാക്കാനാണ് ഇസ്‌റാഈല്‍ ഒരുങ്ങുന്നത്. മറ്റു ഭാഗങ്ങളില്‍ ബോംബാക്രമണം ശക്തമായപ്പോള്‍ നിരവധി ഫലസ്തീനികള്‍ അഭയം തേടിയത് ഈ ഭാഗത്താണ്. പ്രദേശത്ത് അഭയം തേടിയ 10 ലക്ഷത്തിലധികം ഫലസ്തീനികളില്‍ പുതിയ ആക്രമണ നീക്കം പരിഭ്രാന്തി സൃഷ്ടിച്ചിട്ടുണ്ട്.

തെക്കന്‍ ഗസ്സയിലെ റഫയില്‍ ഇസ്‌റാഈല്‍ ഷെല്‍ വര്‍ഷം ആരംഭിച്ചതായും റിപ്പോര്‍ട്ടുകള്‍ പറയുന്നു.

'ഇസ്‌റാഈലിന്റെ ടാങ്കുകള്‍ വന്നു കൊണ്ടേയിരിക്കുന്നു. ഞങ്ങള്‍ക്കു മുന്നില്‍ ഇനി രണ്ട് മാര്‍ഗങ്ങളാണ് ശേഷിക്കുന്നത്. ഒന്നുകില്‍ മരിക്കുക. അല്ലെങ്കില്‍ ഈജിപ്തിലേക്ക് മതില്‍ ചാടുക' 55കാരനായ ഇമാദ് പറയുന്നു. 'ഗസ്സയിലെ ഭൂരിപക്ഷം ജനങ്ങളും ഇപ്പോള്‍ റഫയിലാണുള്ളത്. എങ്ങാനും ഇവിടെ ടാങ്കുകള്‍ ആക്രമണം അഴിച്ചു വിടുകയാണെങ്കില്‍ ലോകം ഇന്നോളം കണ്ടിട്ടില്ലാത്ത കൂട്ടക്കൊലയായിരിക്കും ഇവിടെ നടക്കുക' അദ്ദേഹം കൂട്ടിച്ചേര്‍ത്തു.

'ഞങ്ങള്‍ ഇനിയെന്തു ചെയ്യും. അല്ലെങ്കില്‍ തന്നെ നിരവധി ദുരിതങ്ങളിലൂടെയാണ് ഞങ്ങളുടെ ജീവിതം കടന്നു പോവുന്നത്. യുദ്ധം, പട്ടിണി ഇപ്പോള്‍ മഴയും' ഗസ്സയില്‍ നിന്നുള്ള ഒരു മാതാവ് പറയുന്നു.

'ഞങ്ങളെന്നും മഴയെ കാത്തിരിക്കാറായിരുന്നു. ഞങ്ങളുടെ വീടുകളുടെ ബാല്‍ക്കണികളിലിരുന്നു ഞങ്ങള്‍ മഴ ആസ്വദിക്കാനായി. എന്നാല്‍ ഇന്ന് മഴ ഞങ്ങളുടെ ടെന്റുകളെ കുളമാക്കുന്നു. കാലു വെക്കാന്‍ പോലും ഇടമില്ലാത്ത വിധം. മഴ ഒന്നവസാനിച്ചിരുന്നെങ്കില്‍ എന്നാണ് ഞങ്ങളിപ്പോള്‍ ആഗ്രഹിക്കുന്നത്.

2.3 മില്യണ്‍ വരുന്ന ജനസംഖ്യയുടെ 75 ശതമാനവും കുടിയൊഴിക്കപ്പെട്ടവരാണ്. ഭക്ഷണവും വെള്ളവും മരുന്നും തലചായ്ക്കാനൊരിടവുമില്ലാത്ത അവസ്ഥയിലാണ് ഇവിടുത്തെ ജനത.

കൂടാതെ, യുദ്ധക്കെടുതിയില്‍ അസ്വസ്ഥരായ ഗസ്സയിലെ 12 ലക്ഷം കുട്ടികള്‍ക്ക് മാനസികാരോഗ്യ പിന്തുണ ആവശ്യമാണെന്ന് യു.എന്‍ ചില്‍ഡ്രന്‍സ് ഫണ്ട് (യുനിസെഫ്) കണക്കാക്കുന്നതായി യു.എന്‍ റിപ്പോര്‍ട്ട് ചെയ്യുന്നു. ഗസ്സയിലെ 17,000ത്തോളം കുട്ടികള്‍ ബന്ധുക്കള്‍ നഷ്ടപ്പെട്ട് ഒറ്റപ്പെട്ടതായും യുനിസെഫ് പറയുന്നു.