ദുബൈ: ഇസ്‌റാഈല്‍ സുരക്ഷാ മന്ത്രിസഭാ യോഗം ഇറാനെതിരെ പ്രത്യാക്രമണം നടത്താന്‍ തീരുമാനിച്ചതായി സിഎന്‍എന്‍ ചാനല്‍ റിപ്പോര്‍ട്ട് ചെയ്തു. അതേസമയം ആക്രമണത്തിന്റെ തീയതിയും സ്വഭാവവും തീരുമാനിച്ചിട്ടില്ല. ഇറാനെതിരെ പരിമിത സ്വഭാവത്തിലുള്ള പ്രത്യാക്രമണത്തിന് അമേരിക്കന്‍ പ്രസിഡന്റ് ജോ ബൈഡന്റിന്റെ അനുമതിയും ഇസ്‌റാഈലിനു ലഭിച്ചിട്ടുണ്ട്. എന്നാല്‍, ഇറാന്റെ ആണവ, സിവിലിയന്‍ കേന്ദ്രങ്ങള്‍ ആക്രമിക്കുന്നതിനെ അമേരിക്ക പിന്തുണച്ചേക്കില്ല.

മേഖലയിലെ സൈനിക താവളങ്ങള്‍ ഉപയോഗിച്ച് ഇറാനെതിരെ ആക്രമണം നടത്തുന്നതിന് ഗള്‍ഫ് ഉള്‍പ്പെടെയുള്ള അറബ് രാജ്യങ്ങള്‍ ഇസ്‌റാഈലിനെ അനുവദിക്കില്ല. ഇസ്‌റാഈല്‍ പോര്‍വിമാനങ്ങള്‍ തങ്ങളുടെ വ്യോമാതിര്‍ത്തി ഉപയോഗിക്കാന്‍ ശ്രമിച്ചാല്‍ ആക്രമിക്കാന്‍ സേനക്ക് അനുമതി നല്‍കിയതായി അറബ് രാജ്യങ്ങള്‍ അമേരിക്കയെ അറിയിച്ചുവെന്ന് ഉദ്യോഗസ്ഥരെ ഉദ്ധരിച്ച് യു.എസ് മാധ്യമങ്ങള്‍ റിപ്പോര്‍ട്ട് ചെയ്തു.

മേഖലയിലെ യുഎസ് താവളങ്ങള്‍ മുഖേന തങ്ങളെ ആക്രമിച്ചാല്‍ ബന്ധപ്പെട്ട രാജ്യത്തിന് നേരെ തിരിച്ചടിക്കുമെന്ന് കഴിഞ്ഞ ദിവസം ഇറാന്‍ മുന്നറിയിപ്പ് നല്‍കിയിരുന്നു. തങ്ങള്‍ യുദ്ധം ആഗ്രഹിക്കുന്നില്ലെന്നും അതേസമയം ആക്രമണം നടന്നാല്‍ തിരിച്ചടി മാരകമായിരിക്കുമെന്നും ഇസ്‌റാഈലിന് ഇറാന്‍ മുന്നറിയിപ്പ് നല്‍കി.

Iran cautions Israel against military action, emphasizing its willingness to retaliate with devastating force if necessary, while asserting its reluctance to engage in war.