പാതിരാത്രിയില്‍ വിശക്കാറുണ്ടോ?.. ഈ പ്രശ്‌നം ഒഴിവാക്കാം ഈസിയായി

പാതിരാത്രിയില്‍ വിശക്കുന്നത് പലരേയും അലട്ടുന്നൊരു പ്രശ്‌നമാണ്. രാത്രി അത്താഴമൊക്കെ കഴിഞ്ഞാലും ഏറെ നേരം ഉറങ്ങാതിരുന്നാല്‍ അപ്പോള്‍ വിശപ്പിന്റെ വിളിയായി. പിന്നെ കയ്യില്‍ കിട്ടുന്നതെല്ലാം അങ്ങ് കഴിക്കലാണ് പലരുടേയും രീതി. എന്നാല്‍ ഈ ശീലം അത്ര നല്ലതല്ലെന്നാണ് ആരോഗ്യവിദഗ്ധര്‍ പറയുന്നത്. അമിതവണ്ണം, പ്രമേഹം, ദഹനപ്രശ്‌നങ്ങള്‍, ഉറക്കമില്ലായ്മ, പകല്‍സമയത്ത് തളര്‍ച്ച തുടങ്ങി പല പ്രശ്‌നങ്ങളിലേക്കും ഇത് നയിക്കാം.

രാത്രി ഏറെ നേരം ഫോണിലോ ലാപിലോ ടിവിയിലോ നോക്കിയിരിക്കുന്ന ശീലം ഒഴിവാക്കണം. കാരണം ഉറക്കമില്ലായ്മ, സ്‌ട്രെസ് എന്നിവയെല്ലാം പാതിരാത്രിയില്‍ ഭക്ഷണം കഴിക്കുന്നതിന് നമ്മെ പ്രേരിപ്പിക്കാം.

കഴിക്കുന്ന ഭക്ഷണങ്ങളില്‍ ചിലകാര്യങ്ങള്‍ ശ്രദ്ധിച്ചാല്‍ ഈ പ്രശ്‌നം ഒഴിവാക്കാം. പ്രോട്ടീന്‍ കാര്യമായി അടങ്ങിയ ഭക്ഷണം തന്നെ അത്താഴമായി കഴിക്കുക. ഇത് വിശപ്പിനെ നല്ലരീതിയില്‍ ശമിപ്പിക്കും. വയര്‍ നിറഞ്ഞിരിക്കുന്നതായി തോന്നിപ്പിക്കാന്‍ പ്രോട്ടീന്‍ ഭക്ഷണങ്ങള്‍ക്ക് പ്രത്യേക കഴിവാണ്. കൂടാതെ ഇന്‍സുലിന്‍ ഹോര്‍മോണ്‍ പ്രവര്‍ത്തനങ്ങളെ സ്വാധീനിച്ച് പ്രോട്ടീന്‍ വിശപ്പിനെ കുറയ്ക്കുകയും ചെയ്യുകയാണ്.

ഇനി രാത്രിയില്‍ എന്തെങ്കിലും കഴിക്കണമെന്ന് തോന്നിയാല്‍ അല്‍പം നട്ട്‌സ് കഴിക്കുക. നട്ട്‌സിലുള്ള ഹെല്‍ത്തി ഫാറ്റ് നമ്മുടെ വിശപ്പിനെ പെട്ടെന്ന് ശമിപ്പിക്കും. മറ്റ് ഭക്ഷണങ്ങളിലേക്ക് തിരിയുന്നതില്‍ നിന്ന് നമ്മെ പിന്തിരിപ്പിക്കുകയും ചെയ്യും. പക്ഷേ ഓര്‍ക്കുക ഹെല്‍ത്തി ഫുഡ് ആണെന്നോര്‍ത്ത് നട്ട്‌സും അധികം കഴിക്കരുത്. ഇത് ദോഷം ചെയ്യും.