ഗസ്സയിലെ ജനങ്ങൾക്കായി അഞ്ച് ഓട്ടോമേറ്റഡ് ബേക്കറികൾ അയച്ച് യുഎഇ

അബുദാബി: യുദ്ധക്കെടുതി അനുഭവിക്കുന ഗസ്സയിലെ ജനങ്ങൾക്കായി യുഎഇ നൽകുന്ന അഞ്ച് ഓട്ടോമേറ്റഡ് ബേക്കറികൾ ഞായറാഴ്ച ഈജിപ്തിലെ അൽ-അരിഷ് നഗരത്തിൽ എത്തിയതായി സംസ്ഥാന വാർത്താ ഏജൻസിയായ വാം റിപ്പോർട്ട് ചെയ്തു. ഇസ്‌റാഈൽ നടത്തുന്ന വംശീയ ആക്രമണത്തിൽ കടുത്ത ദുരിതത്തിലാണ് ഗസ്സയിലെ ജനത. കൃത്യമായ ഭക്ഷണം പോലുമില്ലാതെ ദുരിതമനുഭവിക്കുകയാണ് ജനസംഖ്യയിലെ ഭൂരിഭാഗം മനുഷ്യരും.

ഭക്ഷണത്തിന് ആവശ്യമായ റൊട്ടിക്ക് കടുത്ത ക്ഷാമമാണ് ഗസ്സയിൽ നേരിടുന്നത്. ഈ സാഹചര്യത്തിലാണ് ഓട്ടോമേറ്റഡ് ബേക്കറികൾ ഗസ്സയിലെത്തിക്കുന്നത്. ഈ ബേക്കറികൾ പ്രതിദിനം 420,000-ത്തിലധികം ആളുകൾക്ക് ഭക്ഷണം നൽകുമെന്ന് പ്രതീക്ഷിക്കുന്നു. മണിക്കൂറിൽ 17,500 റൊട്ടിയാണ് ഓരോ ബേക്കറിയുടെയും ഉൽപ്പാദന ശേഷി. ബേക്കറികൾ 24 മണിക്കൂറും പ്രവർത്തിക്കുന്നുവെന്ന് ഉറപ്പാക്കാൻ യുഎഇ മൈദ, ഡീസൽ, മറ്റ് ആവശ്യമായ വസ്തുക്കൾ എന്നിവയും നൽകും.

കൂടാതെ, ഗസ്സയിലെ ബേക്കറികൾ പ്രവർത്തിപ്പിക്കുകയും മേൽനോട്ടം വഹിക്കുകയും ചെയ്യുന്ന ആളുകളുടെ ശമ്പളം യുഎഇ നൽകും. ഗസ്സയിലെ ജനങ്ങളെ പിന്തുണയ്ക്കുന്നതിനുള്ള രാജ്യത്തിൻ്റെ "ഗാലൻ്റ് നൈറ്റ് 3" മാനുഷിക പ്രവർത്തനത്തിൻ്റെ ഭാഗമാണ് ഈ സംരംഭം.

ഗസ്സയിലെ ജനങ്ങൾക്ക് യുഎഇ തുടർന്നും സഹായം നൽകുമെന്നും യുദ്ധം ബാധിച്ചവരുടെ ദുരിതം കുറയ്ക്കാൻ സഹായിക്കുമെന്നും എമിറേറ്റ്‌സ് റെഡ് ക്രസൻ്റ് അതോറിറ്റി സെക്രട്ടറി ജനറൽ റാഷിദ് മുബാറക് അൽ മൻസൂരി പ്രസ്താവനയിൽ പറഞ്ഞു. 162 കാർഗോ വിമാനങ്ങളിൽ അയച്ച 15,700 ടൺ സഹായമാണ് യുഎഇ ഗസ്സയിലെ ജനങ്ങൾക്ക് നൽകിയത്.