ലഖ്‌നൗ: ലോക്‌സഭ തെരെഞ്ഞെടുപ്പിനുള്ള മൂന്നാംഘട്ട സ്ഥാനാര്‍ത്ഥി പട്ടിക പ്രഖ്യാപിച്ച് സമാജ്‌വാദി പാര്‍ട്ടി. അഞ്ച് പേരുടെ പട്ടികയാണ് പാര്‍ട്ടി പുറത്ത് വിട്ടിരിക്കുന്നത്.സുരേന്ദ്രസിങ് പട്ടേലാണ് മോദിയുടെ മണ്ഡലമായ വാരാണസിയില്‍ എസ്.പിക്കായി മത്സരിക്കുന്നത്.മുതിര്‍ന്ന നേതാവും പാര്‍ട്ടി അധ്യക്ഷന്‍ അഖിലേഷ് യാദവിന്റെ അമ്മാവനുമായ ശിവ്പാല്‍ യാദവ് ബുദൗന്‍ മണ്ഡലത്തില്‍ നിന്ന് ജനവിധി തേടും. ഇറ്റാവ ജില്ലയിലെ ജസ്വന്ത് നഗറില്‍ നിന്നുള്ള എം.എല്‍.എയാണ്.

ശിവ്പാല്‍ യാദവ്.ഇഖ്‌റ ഹസന്‍ കൈരാനയില്‍ നിന്നും പ്രവീണ്‍ സിംഗ് ആരോണ്‍ ബറേലിയിലും അജേന്ദ്ര സിംഗ് രാജ്പുത് ഹമീര്‍പൂരിയിലും ജനവിധിതേടും. ഇതുവരെ 31 സ്ഥാനാര്‍ഥികളെയാണ് സമാജ് വാദി പാര്‍ട്ടി പ്രഖ്യാപിച്ചത്. ഇന്ത്യ സഖ്യത്തിന്റെ ഭാഗമായ എസ്.പി കോണ്‍ഗ്രസിന് 17 സീറ്റുകളാണ് വാഗ്ദാനം ചെയ്തിരിക്കുന്നത്. 17 സീറ്റുകള്‍ നല്‍കാമെന്ന് അറിയിച്ചുവെന്നും ഇനി ഇതില്‍ കോണ്‍ഗ്രസ് തീരുമാനമെടുക്കട്ടെയെന്നുമാണ് എസ്.പി നിലപാട്. എന്നാല്‍, ഓഫറിനോട് കോണ്‍ഗ്രസ് പ്രതികരിച്ചിട്ടില്ലെന്നാണ് വിവരം.