കുതിച്ചുയർന്ന് സ്വർണവില; 46,000 കടന്നു, ഇനിയുമുയർന്നേക്കും

കൊച്ചി: സംസ്ഥാനത്ത് സ്വര്‍ണവില വീണ്ടും പുതിയ ഉയരങ്ങളിലേക്ക് കുതിക്കുന്നു. ഏതാനും ദിവസങ്ങളിലെ ഇടിവിനു പിന്നാലെ സ്വർണവില ഇന്ന് പവന് 200 രൂപ ഉയർന്നു. ഇതോടെ ഒരിടവേളക്ക് ശേഷം 46,000 കടന്നു. ഗ്രാമിന് 25 രൂപയാണ് ഇന്ന് കൂടിയത്. 5760 രൂപയാണ് ഒരു ഗ്രാം സ്വര്‍ണത്തിന്റെ വില. 46,080 രൂപയാണ് ഒരു പവന്‍ സ്വര്‍ണത്തിന്റെ വില. 18 കാരറ്റ് സ്വർണത്തിന്റെ ഒരു ഗ്രാം വില 4713 രൂപയാണ്.

ഓരോ ദിവസവും വില ഉയരുന്നതോടെ കല്യാണം ഉൾപ്പെടെയുള്ളവയ്ക്ക് സ്വർണം വാങ്ങാൻ നിൽക്കുന്നവരുടെ ആശങ്ക വർധിക്കുകയാണ്. റമദാനിനു മുൻപ് വിവാഹങ്ങൾ നടക്കുന്ന കാലമായതിനാൽ നിലവിൽ സ്വർണം വാങ്ങുന്നവരുടെ എണ്ണം കൂടുതലാണ്. വില വർധിക്കുന്നത് ഇവർക്കെല്ലാം ആശങ്കയാണ്.

ഈ മാസത്തിന്റെ തുടക്കത്തില്‍ 46,520 രൂപയായിരുന്നു സ്വര്‍ണവില. ഫെബ്രുവരി രണ്ടിന് 46,640 രൂപയായി ഉയര്‍ന്ന് ഈ മാസത്തെ ഏറ്റവും ഉയര്‍ന്ന നിലവാരത്തില്‍ എത്തി. 45520 രൂപയാണ് ഈ മാസം രേഖപ്പെടുത്തിയ കുറഞ്ഞ വില. നിലവിലെ വർധന കണക്കാക്കുമ്പോൾ ഈ മാസം അവസാനത്തേക്ക് സ്വർണവില റെക്കോർഡിലേക്ക് എത്തുമെന്നാണ് സൂചന.

കേരളത്തിൽ ഇന്ന് വെള്ളിയുടെ വിലയിൽ നേരിയ തോതിൽ വർധനവുണ്ടായി. ഒരു ഗ്രാം സാധാരണ വെള്ളിയുടെ വില 77.20 രൂപയാണ്. ഒരു പവൻ വെള്ളിയുടെ വില 617.60 രൂപയുമാണ്.

ഡോളർ വില ഇടിയുന്നതാണ് സ്വർണവില ഉയരാൻ കാരണമാകുന്നത്. ഡോളറിന്റെ വില ഇടിവ് തുടരുമെന്നതിനാൽ സ്വർണവില ഇനിയും ഉയരും. ബ്രിട്ടൻ ഉൾപ്പെടെയുള്ള യൂറോപ്യൻ രാജ്യങ്ങളും ജപ്പാനും സാമ്പത്തിക മാന്ദ്യത്തിലേക്ക് നീങ്ങുന്നതും സ്വർണവില ഉയരാൻ കാരണമാകും.