അബുദബി:അബുദബിയിലെ അനധികൃത വില്പനക്കാർക്കെതിരെ നിയമനടപടികൾ ശക്തമാക്കുന്നതിന്റെ ഭാഗമായി അബുദബി സിറ്റി മുനിസിപ്പാലിറ്റി ഒരു പ്രത്യേക പ്രചാരണ പരിപാടി ആരംഭിച്ചു. 2024 ഫെബ്രുവരി 20-നാണ് അബുദബി സിറ്റി മുനിസിപ്പാലിറ്റി ഇക്കാര്യം അറിയിച്ചത്.

ഈ പ്രചാരണ പരിപാടിയിലൂടെ എമിറേറ്റിൽ ലൈസൻസ് കൂടാതെ പ്രവർത്തിക്കുന്ന വ്യാപാരികൾ, തെരുവോര കച്ചവടക്കാർ എന്നിവരെ കണ്ടെത്തുന്നതിന് മുനിസിപ്പാലിറ്റി ലക്ഷ്യമിടുന്നു. പെർമിറ്റുകളില്ലാതെ പ്രവർത്തിക്കുന്ന തെരുവോര കച്ചവടക്കാർ മുന്നോട്ട് വെക്കുന്ന അപകടങ്ങളെക്കുറിച്ച് സമൂഹത്തിലെ വിവിധ മേഖലകളിലെ വ്യക്തികൾക്കിടയിൽ അവബോധം വളർത്തുന്നതും ഈ പ്രചാരണ പരിപാടിയുടെ ലക്ഷ്യങ്ങളിലൊന്നാണ്.

ഉപഭോക്താക്കളുടെ സുരക്ഷ, നൽകുന്ന സേവനത്തിന്റെ ഗുണനിലവാരം എന്നിവ മുൻനിർത്തി വാണിജ്യപ്രവർത്തനങ്ങൾ നിയമങ്ങളും, ചട്ടങ്ങളും പാലിക്കേണ്ടത് ഏറെ പ്രധാനമാണെന്ന് അധികൃതർ ചൂണ്ടിക്കാട്ടി. ലൈസൻസ് കൂടാതെ പ്രവർത്തിക്കുന്ന വില്പനക്കാരിൽ നിന്ന് സേവനങ്ങൾ സ്വീകരിക്കരുതെന്ന് എമിറേറ്റിലെ നിവാസികളോട് മുനിസിപ്പാലിറ്റി നിർദ്ദേശിച്ചിട്ടുണ്ട്.

Content Highlights:Abu Dhabi steps up legal action against illegal traders

ദുബൈയിലെ ഓൾഡ് മുനിസിപ്പൽ സ്ട്രീറ്റ് കാൽനട ടൂറിസ്റ്റ് കോറിഡോറാകുന്നു

ദുബൈ:ദെയ്‌റയിലെ ഓൾഡ് മുനിസിപ്പൽ സ്ട്രീറ്റിനെ വിനോദസഞ്ചാരികൾക്കുള്ള ഒരു പ്രധാന കാൽനട ടൂറിസ്റ്റ് കോറിഡോറാക്കി മാറ്റുന്നതിനുള്ള പ്രവർത്തനങ്ങൾ പൂർത്തിയാക്കിതായി ദുബൈ മുനിസിപ്പാലിറ്റി അറിയിച്ചു. 2024 ഫെബ്രുവരി 19-നാണ് എമിറേറ്റ്സ് ന്യൂസ് ഏജൻസി ഇക്കാര്യം റിപ്പോർട്ട് ചെയ്തത്.

ഈ പരമ്പരാഗത തെരുവിനെ ഇതിന്റെ ഭാഗമായി കാൽനടയായെത്തുന്ന വിനോദസഞ്ചാരികൾക്ക് വാണിജ്യ സേവനങ്ങൾ നൽകുന്ന പ്രധാനപ്പെട്ട ഒരു ടൂറിസ്റ്റ് ആകർഷണമാക്കി മാറ്റിയിട്ടുണ്ട്. റാസ്‌ ഏരിയ മുതൽ വിഖ്യാതമായ ഗോൾഡ് മാർക്കറ്റ് വരെ നീണ്ട് കിടക്കുന്ന ഈ പാത സഞ്ചാരികളുടെ മുൻപിൽ ദുബായിയുടെ ഉജ്ജ്വലമായ പാരമ്പര്യത്തിലേക്കുള്ള വഴി തെളിക്കുന്നു.

ഓൾഡ് മുനിസിപ്പൽ സ്ട്രീറ്റ് പദ്ധതിയുടെ ഭാഗമായി ഈ തെരുവിൽ മുനിസിപ്പാലിറ്റി അതിവിപുലമായ നവീകരണ പ്രവർത്തനങ്ങൾ നടത്തിയിട്ടുണ്ട്. ഈ തെരുവിലെ നടപ്പാതകൾ നവീകരിക്കുകയും, പുതിയ ഒരു ഗേറ്റ് സ്ഥാപിക്കുകയും, തെരുവ് വിളക്കുകൾ സ്ഥാപിക്കുകയും ചെയ്യുന്നതിനൊപ്പം ഇവിടെ പരമ്പരാഗത രീതിയിലുള്ള അലങ്കാരങ്ങൾ ഉൾപ്പെടുത്തുകയും ചെയ്തിട്ടുണ്ട്.ഈ തെരുവിലെത്തുന്നവർക്ക് വിശ്രമിക്കുന്നതിനായി പരമ്പരാഗത രീതിയിലുള്ള ഇരിപ്പിടങ്ങളും, കുടകളും ഒരുക്കിയിട്ടുണ്ട്.