കൊല്‍ക്കത്ത: ബംഗാളില്‍ കോണ്‍ഗ്രസുമായി സഖ്യമില്ലെന്നും തൃണമൂല്‍ കോണ്‍ഗ്രസ് ഒറ്റക്ക് ലോക്‌സഭ തിരഞ്ഞെടുപ്പില്‍ മത്സരിക്കുമെന്നും അഭിഷേക് ബാനര്‍ജി. നേരത്തെ മമതയും തൃണമൂല്‍ ഒറ്റക്കാണ് ലോക്‌സഭ ഇലക്ഷനില്‍ മത്സരിക്കുക എന്ന് അറിയിച്ചിരുന്നു. ഇതിന് ശേഷവും കോണ്‍ഗ്രസ് സഖ്യസാധ്യതകള്‍ക്കായി ശ്രമിക്കവെയാണ് അഭിഷേക് ബാനര്‍ജി പാര്‍ട്ടിയുടെ നയം വ്യക്തമാക്കിയത്.

ഇന്ത്യ സഖ്യത്തിന്റെ സീറ്റ് ധാരണയിലേക്ക് തൃണമൂല്‍ എത്തിയാല്‍ മേഘാലയയിലും അസമിലും സീറ്റ് നല്‍കാന്‍ തയ്യാറാണെന്ന് കോണ്‍ഗ്രസ് നേതൃത്വം അറിയിച്ചിരുന്നു. അനുനയിപ്പിക്കാനുള്ള ചുമതല ഏറ്റെടുത്ത് സോണിയ ഗാന്ധിയോ മല്ലികാര്‍ജുന്‍ ഖര്‍ഗെയോ മമത ബാനര്‍ജിയുമായി സംസാരിക്കും എന്ന തീരുമാനത്തില്‍ കോണ്‍ഗ്രസ് തുടരുകയാണ്. എന്നാല്‍ ഒരു തരത്തിലും സഖ്യം വേണ്ട എന്ന സമീപനമാണ് തൃണമൂല്‍ കോണ്‍ഗ്രസിന്റേത്.