മുസ്‌ലിം ലീഗ് സ്ഥാനാർഥികളെ ഇന്ന് പ്രഖ്യാപിക്കും; പാര്‍ലമെന്ററി പാര്‍ട്ടി യോഗം പാണക്കാട് ചേരും

മലപ്പുറം: ലോക്‌സഭ തെരഞ്ഞെടുപ്പ് സ്ഥാനാർഥി നിര്‍ണയത്തിനായി മുസ്‌ലിം ലീഗ് പാര്‍ലമെന്ററി പാര്‍ട്ടി യോഗം ഇന്ന് ചേരും. സംസ്ഥാന അധ്യക്ഷൻ പാണക്കാട് സയ്യിദ് സാദിഖലി ശിഹാബ് തങ്ങളുടെ വസതിയില്‍ രാവിലെ പത്തു മണിക്കാണ് യോഗം. മലപ്പുറത്തിനും പൊന്നാനിക്കും പുറമെ തമിഴ്നാട് രാമനാഥപുരത്തെ സ്ഥാനാർഥിയെയും ഇന്ന് പ്രഖ്യാപിച്ചേക്കും. മൂന്നാം സീറ്റിന്റെ കാര്യത്തിലും യോഗത്തില്‍ തീരുമാനമുണ്ടായേക്കുമെന്നാണ് സൂചന.

മലപ്പുറത്ത് ഇ.ടി മുഹമ്മദ് ബഷീറും പൊന്നാനിയില്‍ അബ്ദുസമദ് സമദാനിയും മത്സരിക്കാൻ ധാരണയായതാണ്. ഇരുവരും സിറ്റിംഗ് എം.പിമാരാണ്. മണ്ഡലങ്ങൾ പരസ്പരം മാറി മത്സരിക്കാനാണ് സാധ്യത. രാമനാഥപുരത്ത് സിറ്റിങ് എം.പി നവാസ് കനി വീണ്ടും മത്സരിച്ചേക്കും.

തെരഞ്ഞെടുപ്പില്‍ യുവാക്കള്‍ക്ക് സ്ഥാനാര്‍ത്ഥിത്വം നല്‍കണമെന്ന ആവശ്യം ഉയര്‍ന്നിട്ടുണ്ട്. മൂന്നാം സീറ്റിന് പകരം രാജ്യസഭാ സീറ്റ് നല്‍കാമെന്ന കോണ്‍ഗ്രസ് വാഗ്ദാനം മുസ്ലിം ലീഗ് നേതൃത്വം സ്വീകരിച്ചേക്കും. അങ്ങനെ ലീഗിന് ലഭിക്കുന്ന അധിക രാജ്യസഭാ സീറ്റിൽ ആരെന്ന കാര്യത്തിലേക്കും ഇന്നത്തെ ചർച്ച കടക്കും. പിഎംഎ സലാം, പി.കെ ഫിറോസ്, ഫൈസൽ ബാബു തുടങ്ങിയവരെയാണ് ഈ സീറ്റിലേക്ക് പരിഗണിക്കുന്നത്.