കെഎസ് യു പ്രവര്‍ത്തകരെ എസ്.എഫ്.ഐ മര്‍ദ്ദിച്ചെന്ന്; കേരള സര്‍വകലാശാല കലോത്സവ വേദിയില്‍ പ്രതിഷേധം

തിരുവനന്തപുരം: കേരള സര്‍വകലാശാല കലോത്സവ വേദിയില്‍ പ്രതിഷേധം. രാവിലെ ഒപ്പന മത്സര വേദിയില്‍ കെ.എസ്.യു പ്രവര്‍ത്തകരാണ് പ്രതിഷേധിക്കുന്നത്. കലോത്സവത്തില്‍ പങ്കെടുക്കാനും കാണാനുമെത്തിയ കെ.എസ്.യു പ്രവര്‍ത്തകരെ എസ്.എഫ്.ഐക്കാരായ സംഘാടക സമിതിക്കാര്‍ തെരഞ്ഞെുപിടിച്ച് മര്‍ദ്ദിച്ചു എന്നാരോപിച്ചാണ് പ്രതിഷേധം. പ്രതിഷേധം പിന്നീട് സംഘര്‍ഷത്തിലേക്ക് വഴിവെച്ചു. പിന്നാലെ പൊലിസെത്തി പ്രതിഷേധക്കാരെ അറസ്റ്റ് ചെയ്ത് നീക്കി.

എസ്.എഫ്.ഐക്കാര്‍ തല്ലിച്ചതച്ച രണ്ടുപേര്‍ മെഡിക്കല്‍ കോളജ് ആശുപത്രിയില്‍ ചികിത്സയിലാണെന്നും പ്രതിഷേധക്കാര്‍ പറയുന്നു. ശ്രീജിത്ത് എന്ന എസ്.എഫ.്‌ഐ നേതാവിന്റെ നേതൃത്വത്തിലാണ് മര്‍ദ്ദനം അരങ്ങേറിയത്. മര്‍ദ്ദനം നോക്കി നിന്ന പൊലീസ്, നിങ്ങള്‍ എന്തിനാണ് ഇവിടെ വന്നതെന്നാണ് ചോദിച്ചതെന്നും കെ.എസ്.യു പ്രവര്‍ത്തകര്‍ പറയുന്നു.

കെ.എസ്.യു ഭരിക്കുന്ന കോളജുകളിലെയും കെ എസ് യു അനുഭാവമുള്ള വിദ്യാര്‍ത്ഥികളും മത്സരിക്കാനെത്തുമ്പോള്‍ വ്യാപകമായി മര്‍ദ്ദിക്കുന്നുവെന്നാണ് ആരോപണം. ജീവനു സംരക്ഷണം കിട്ടിയതിന് ശേഷ മാത്രം മത്സരം നടത്തിയാല്‍ മതിയെന്ന് മുദ്രാവാക്യം മുഴക്കി കെ എസ് യു പ്രവര്‍ത്തകര്‍ വേദിയില്‍ കുത്തിയിരുന്നു പ്രതിഷേധിച്ചു. പൊലിസ് ഇവരെ തടഞ്ഞു.