കോഴിക്കോട്: കാലിക്കറ്റ് പ്രസ് ക്ലബിന്റെ മുഷ്താഖ് ഫോട്ടോഗ്രഫി അവാര്‍ഡിന് സുപ്രഭാതം തിരുവനന്തപുരം ബ്യൂറോയിലെ സീനിയര്‍ ഫോട്ടോഗ്രാഫര്‍ ടി.കെ ദീപപ്രസാദ് അര്‍ഹനായി. പ്രമുഖ കളിയെഴുത്തുകാരനായിരുന്ന പി.എ മുഹമ്മദ്‌കോയ എന്ന മുഷ്താഖിന്റെ സ്മരണാര്‍ഥം കോഴിക്കോട് ജില്ലാ ഫുട്‌ബോള്‍ അസോസിയേഷന്റെ സഹകരണത്തോടെ ഏര്‍പ്പെടുത്തിയ അവാര്‍ഡ് 10,000 രൂപയും പ്രശസ്തി പത്രവുമടങ്ങുന്നതാണ്. മുഷ്താഖ് സ്‌പോര്‍ട്‌സ് ജേണലിസം അവാര്‍ഡിന് സി.പി ബിനീഷും (സീനിയര്‍ റിപ്പോര്‍ട്ടര്‍, മാധ്യമം കേഴിക്കോട്) അര്‍ഹനായി.
2019 ഡിസംബര്‍ ഒന്‍പതിന് ടൈംസ് ഓഫ് ഇന്ത്യയില്‍ പ്രസിദ്ധീകരിച്ച 'കൈവിട്ട കളി' എന്ന ചിത്രമാണ് ദീപപ്രസാദിനെ അവാര്‍ഡിന് അര്‍ഹനാക്കിയത്. തിരുവനന്തപുരത്ത് നടന്ന ഇന്ത്യ വെസ്റ്റിന്‍ഡീസ് ട്വന്റി-20 ക്രിക്കറ്റ് മത്സരത്തില്‍ റിഷഭ് പന്തിന്റെ കൈയില്‍ നിന്ന് ബാറ്റ് തെറിക്കുന്ന ചിത്രത്തിനാണ് അവാര്‍ഡ്. കണ്ണൂര്‍ പിണറായി പാറപ്രം പ്രസാദം വീട്ടില്‍ ആര്‍.കെ ഗിരിധരന്റെയും ടി.കെ കാര്‍ത്ത്യായനിയുടേയും മകനാണ് ദീപപ്രസാദ്. ഭാര്യ: പി.എസ് രശ്മി (റിപ്പോര്‍ട്ടര്‍, ജനയുഗം തിരുവനന്തപുരം), ടി.കെ ദയാനിധി സഹോദരനാണ്.
കണ്ണൂര്‍ പ്രസ് ക്ലബ് വിക്ടര്‍ ജോര്‍ജ് സ്മാരക ഗോള്‍ഡ് മെഡല്‍, കൊച്ചി ഫോട്ടോജേണലിസ്റ്റ് ഫോറം സി.കെ ജയകൃഷ്ണന്‍ സ്മാരക ന്യൂസ് ഫോട്ടോഗ്രാഫി അവാര്‍ഡ്, ഐ.എഫ്.എഫ്.കെ വാര്‍ത്താചിത്ര പുരസ്‌കാരം, പൊലിസ് സ്മൃതി ദിന ഫോട്ടോഗ്രാഫി അവാര്‍ഡ് എന്നിവ ലഭിച്ചിട്ടുണ്ട്.