തിരുവനന്തപുരം: കേന്ദ്ര കാര്‍ഷിക നിയമങ്ങള്‍ക്കെതിരെ സംസ്ഥാന നിയമസഭ പാസാക്കിയ പ്രമേയം കേന്ദ്ര സര്‍ക്കാരിന് അയക്കാന്‍ ചീഫ് സെക്രട്ടറിക്ക് കൈമാറി.

പ്രമേയം തന്റെ കൈവശം ലഭിച്ചില്ലെന്നു കഴിഞ്ഞ ദിവസം ഗവര്‍ണര്‍ ആരിഫ് മുഹമ്മദ്ഖാന്‍ പറഞ്ഞിരുന്നു. എന്നാല്‍, നിയമസഭ പാസാക്കുന്ന പ്രമേയങ്ങള്‍ ഗവര്‍ണര്‍ വഴിയല്ല കേന്ദ്ര സര്‍ക്കാരിനു കൈമാറുന്നത്. നിയമസഭ പാസാക്കുന്ന ബില്ലുകള്‍ മാത്രമാണ് ഗവര്‍ണറുടെ അംഗീകാരത്തോടെ കേന്ദ്ര സര്‍ക്കാരിനു കൈമാറുന്നത്.

കാര്‍ഷിക പ്രശ്‌നം ചര്‍ച്ച ചെയ്യുന്നതിനായി പ്രത്യേത നിയമസഭാ സമ്മേളനം വിളിച്ചു ചേര്‍ക്കുന്നതുമായി ബന്ധപ്പെട്ടു ഗവര്‍ണറും സര്‍ക്കാരുമായി ഇടഞ്ഞിരുന്നു. ഡിസംബര്‍ 23നു നിയമസഭാ സമ്മേളനം വിളിച്ചു ചേര്‍ക്കാനുള്ള മന്ത്രിസഭാ ശിപാര്‍ശ ഗവര്‍ണര്‍ അനുവദിച്ചില്ല.

സാങ്കേതിക പ്രശ്‌നം ചൂണ്ടിക്കാട്ടിയായിരുന്നു അന്ന് അനുമതി നല്‍കാതിരുന്നത്. തുടര്‍ന്ന് വീണ്ടും മന്ത്രിസഭ ചേര്‍ന്നു 31നു വീണ്ടും സമ്മേളനം ചേരാന്‍ ശിപാര്‍ശ നല്‍കുകയും ഗവര്‍ണര്‍ അനുമതി നല്‍കുകയും ചെയ്തിരുന്നു.