ന്യൂഡല്‍ഹി: വിദേശരാജ്യങ്ങളില്‍ ജോലി ചെയ്യുന്ന ഇന്ത്യക്കാര്‍ക്ക് അതത് രാജ്യങ്ങളില്‍ നിന്ന് വോട്ടുചെയ്യാന്‍ ഇലക്ട്രോണിക് ബാലറ്റ് സംവിധാനമൊരുക്കണമെന്ന തെരഞ്ഞെടുപ്പ് കമ്മീഷന്റെ ശുപാര്‍ശയില്‍ അനുകൂല നിലപാട് സ്വീകരിച്ച് വിദേശകാര്യമന്ത്രാലയം.
ഇക്കാര്യം ചൂണ്ടിക്കാട്ടി വിദേശകാര്യമന്ത്രാലയം തെരഞ്ഞെടുപ്പ് കമ്മീഷന് കത്തു നല്‍കി. പദ്ധതി പ്രാബല്യത്തില്‍ കൊണ്ടുവരും മുമ്പ് ബന്ധപ്പെട്ട മന്ത്രാലയങ്ങള്‍, ഡിപ്പാര്‍ട്ടുമെന്റുകള്‍ പ്രവാസി സംഘടനകള്‍ തുടങ്ങി എല്ലാവരുമായും തെരഞ്ഞെടുപ്പ് കമ്മിഷന്‍ കൂടിയാലോചന നടത്തണമെന്നു വിദേശകാര്യ മന്ത്രാലയം നിര്‍ദേശിച്ചു. വോട്ടെടുപ്പ് നടത്താന്‍ ആവശ്യമായ ജീവനക്കാര്‍ എംബസികളിലുണ്ടെന്ന് തെരഞ്ഞെടുപ്പ് കമ്മീഷന്‍ ഉറപ്പ് വരുത്തണം.

കേരളം ഉള്‍പ്പെടെയുള്ള സംസ്ഥാനങ്ങളില്‍ വരാനിരിക്കുന്ന നിയമസഭാ തെരഞ്ഞെടുപ്പില്‍ തന്നെ ഈ സംവിധാനം കൊണ്ടുവരാമെന്ന തെരഞ്ഞെടുപ്പ് കമ്മീഷന്റെ നിര്‍ദേശത്തോടും വിദേശ കാര്യമന്ത്രാലയം അനുകൂല നിലപാട് സ്വീകരിച്ചു. വിദേശകാര്യമന്ത്രാലയം അനുകൂല നിലപാട് സ്വീകരിച്ചതോടെ 1961ലെ തെരഞ്ഞെടുപ്പ് നടത്തിപ്പ് ചട്ടത്തില്‍ ഭേദഗതി കൊണ്ടുവരുകയാണ് അടുത്ത നടപടി. പ്രവാസികള്‍ക്ക് ഇലക്ട്രോണിക് ബാലറ്റ് സംവിധാനത്തിലൂടെ വോട്ടു ചെയ്യാന്‍ അനുവദിക്കാന്‍ തയ്യാറാണെന്ന് ചൂണ്ടിക്കാട്ടി ആഴ്ചകള്‍ക്ക് മുമ്പാണ് കേന്ദ്ര സര്‍ക്കാരിന് തെരഞ്ഞെടുപ്പ് കമ്മീഷന്‍ ശുപാര്‍ശ നല്‍കിയത്.

തെരഞ്ഞെടുപ്പ് വിജ്ഞാപനം വന്ന് അഞ്ച് ദിവസത്തിനകം വോട്ട് ചെയ്യേണ്ടവര്‍ റിട്ടേണിങ് ഓഫിസറെ അറിയിക്കുക. ഓഫിസര്‍ വിതരണം ചെയ്യുന്ന ഇലക്ട്രോണിക് ബാലറ്റ് പേപ്പറില്‍ വോട്ട് രേഖപ്പെടുത്തി നയതന്ത്ര പ്രതിനിധിയുടെ സാക്ഷ്യപത്രം വാങ്ങുക.
ഇതാണ് കമ്മീഷന്‍ കേന്ദ്രത്തിന് സമര്‍പ്പിച്ച രൂപരേഖ. വോട്ട് രേഖപ്പെടുത്തിയ ബാലറ്റ് റിട്ടേണിങ് ഓഫീസര്‍ക്ക് തന്നെ അയക്കണമോ എംബസികളില്‍ നിക്ഷേപിച്ചാല്‍ മതിയാകുമോയെന്ന കാര്യം വ്യക്തമായിട്ടില്ല.