ന്യൂഡൽഹി
വിദ്വേഷ പ്രചാരണം രാജ്യത്ത് സജീവമാകുമ്പോഴും പ്രധാനമന്ത്രിയുടെ മൗനം ചൂണ്ടിക്കാട്ടി ഇന്ത്യൻ ഇൻസ്റ്റിറ്റ്യൂട്ട് ഓഫ് മാനേജ്‌മെന്റ് (ഐ.ഐ.എം) വിദ്യാർഥികളും അധ്യാപകരും അദ്ദേഹത്തിന് കത്തയച്ചു. താങ്കളുടെ മൗനം വിദ്വേഷം ശക്തിപ്പെടുത്തുമെന്ന് അവർ കത്തിൽ പ്രധാനമന്ത്രി നരേന്ദ്രമോദിയെ ഓർമിപ്പിച്ചു.
ഹരിദ്വാറിലെ വംശഹത്യാ ആഹ്വാനം, ജാതീയ ആക്രമണങ്ങൾ, മുസ്‌ലിം വിദ്വേഷം എന്നിവയുടെ പശ്ചാത്തലത്തിലാണ് രാജ്യത്തെ ഉന്നത മാനേജ്‌മെന്റ് പഠന-ഗവേഷണ സ്ഥാപനത്തിലെ വിദ്യാർഥികൾ പ്രധാനമന്ത്രിക്ക് കത്തെഴുതിയത്.
രാജ്യത്തിന്റെ ഐക്യത്തിനും അഖണ്ഡതയ്ക്കും എതിരാണ് വിദ്വേഷ പ്രചാരണമെന്നും ജനങ്ങളെ വിഭജിക്കുന്ന പ്രവണയ്‌ക്കെതിരേ മൗനം വെടിഞ്ഞ് രംഗത്തു വരണമെന്നും പ്രധാനമന്ത്രിയോട് വിദ്യാർഥികൾ അഭ്യർഥിച്ചു.
വിദ്വേഷ പ്രചാരണം, സമുദായങ്ങൾക്കെതിരേയുള്ള ആക്രമണം, ജാതി വിഭാഗീയത എന്നിവ അംഗീകരിക്കാനാകില്ല. ഭരണഘടന നൽകുന്ന അവകാശവും മതസ്വാതന്ത്ര്യവും ഹനിക്കപ്പെടരുത്. പൗരന്മാർ ഭയത്തോടെയല്ല കഴിയേണ്ടത് എന്നിങ്ങനെ പ്രധാനമന്ത്രിയുടെ ശ്രദ്ധയിൽ കൊണ്ടുവരാനുള്ള കാര്യങ്ങൾ വിദ്യാർഥികൾ കത്തിൽ അക്കമിട്ട് പറയുന്നുണ്ട്.
മുസ് ലിം സഹോദരങ്ങൾക്കും സഹോദരിമാർക്കും നേരെയുള്ള വിദ്വേഷം, ചർച്ചുകൾക്കും ആരാധനാലയങ്ങൾക്കും എതിരെയുള്ള ആക്രമണം എന്നിവയും കത്തിൽ എടുത്തുപറയുന്നു. 13 ഫാക്കൽറ്റി അംഗങ്ങൾ ഉൾപ്പെടെ ഐ.ഐ.എം അഹമ്മദാബാദ്, ഐ.ഐ.എം ബംഗളൂരു എന്നിവിടങ്ങളിലെ 183 പേരാണ് കത്തിൽ ഒപ്പുവച്ചിരിക്കുന്നത്.