മാനന്തവാടി: നഗരത്തിലെ വ്യാപാര സ്ഥാപനങ്ങള്‍ ഉള്‍പ്പെടെയുള്ള കെട്ടിടങ്ങളിലെ പാര്‍ക്കിങ് ഭാഗങ്ങളിലെ  കയേറ്റങ്ങളുമായി ബന്ധപ്പെട്ട് വിജിലന്‍സ് നടത്തിയ പരിശോധനയില്‍ വ്യാപക ക്രമക്കേട് കണ്ടെത്തിയതായി സൂചന.
സി.പി.ഐ മാനന്തവാടി ലോക്കല്‍ കമ്മിറ്റി വയനാട് വിജിലന്‍സ് ഡിവൈ.എസ്.പിക്ക് നല്‍കിയ പരാതിയുടെ അടിസ്ഥാനത്തില്‍ നടത്തിയ പരിശോധനയിലാണ് ക്രമക്കേട് കണ്ടെത്തിയത്. നഗരത്തിലെ കെട്ടിടങ്ങളിലെയും വ്യാപാര സ്ഥാപനങ്ങളിലെയും പാര്‍ക്കിങ് ഭാഗങ്ങള്‍ കയേറി പരസ്യ ബോര്‍ഡുകളും, വില്‍പ്പന വസ്തുക്കളും വ്യാപകമായി വച്ചിരിക്കുകയാണ്.
 ഇതിനെതിരേ നിരവധി പരാതികള്‍ വിവിധ കോണുകളില്‍ നിന്ന് ഉയര്‍ന്നിരുന്നു. പുതിയ കെട്ടിടങ്ങള്‍ നിര്‍മിക്കുമ്പോള്‍ പ്ലാനില്‍ പാര്‍ക്കിങ് ഭാഗമായി രേഖപ്പെടുത്തി അനുമതി വാങ്ങുകയും പിന്നീട് ഈ ഭാഗങ്ങള്‍ കടകളാക്കി മാറ്റുകയും വില്‍പന വസ്തുക്കള്‍ ഇറക്കി വെക്കുകയുമാണ് ചെയ്യുന്നത്. ഇതിനാല്‍ മാനന്തവാടി നഗരത്തില്‍ ഗതാഗത കുരുക്കും അവസാനിക്കാറില്ല. വിവിധ ആവശ്യങ്ങള്‍ക്കായി നഗരത്തില്‍ എത്തുന്നവര്‍ക്ക് വാഹനങ്ങള്‍ പാര്‍ക്ക് ചെയ്യാന്‍ കഴിയാത്തത് ഒട്ടെറെ ബുദ്ധിമുട്ടുകള്‍ സൃഷ്ടിക്കുകയാണ്. ഇതിനെതിരേ അധികൃതര്‍ക്ക് പരാതി നല്‍കിയെങ്കിലും നടപടികള്‍ ഉണ്ടായിരുന്നില്ല.
 ഈ സാഹചര്യത്തിലാണ് വയനാട് വിജിലന്‍സ് ഡിവൈ.സ്.പി, സി.ഐ എന്നിവരുടെ നേതൃത്വത്തില്‍ കഴിഞ്ഞ ദിവസങ്ങളില്‍ പരിശോധന നടത്തിയത്. പരിശോധനയില്‍ വ്യാപക ക്രമക്കേട് കണ്ടെത്തിയതായും ഇത് സംബന്ധിച്ച റിപ്പോര്‍ട്ട് വിജിലന്‍സ് ഡയറക്ടര്‍ക്ക് സമര്‍പ്പിച്ചതായും സൂചനയുണ്ട്. അനധികൃത നിര്‍മാണങ്ങള്‍ക്കും, പാര്‍ക്കിങ് ഏരിയകളിലെ കയേറ്റങ്ങള്‍ക്കും ഒത്താശ ചെയ്ത ഉദ്യോഗസ്ഥര്‍ക്കെതിരേയും നടപടിക്ക് ശുപാര്‍ശ ചെയ്തതായും പറയപ്പെടുന്നുണ്ട്.