കേളകം: ഇരു വൃക്കകളും തകരാറിലായി ജീവിതം വഴിമുട്ടിയ കീഴല്ലൂര്‍ കുറ്റിക്കരയിലെ സി.എം വിനോദ് കുമാറിന്റെ ചികിത്സയ്ക്കു ഫണ്ട് കണ്ടെത്തുന്നതിനായി രണ്ടു ബസുകള്‍ ഇന്നലെ സര്‍വിസ് നടത്തി. ഇന്ന് വൃക്ക മാറ്റിവയ്ക്കല്‍ ശസ്ത്രക്രിയക്കു വിധേയനാവുന്ന വിനോദ് കുമാറിനു കൈത്താങ്ങായാണു കാരുണ്യപാതയില്‍ രണ്ടു ബസുകള്‍ സര്‍വിസ് നടത്തിയത്. കുറ്റിക്കരയിലെ ഇ സുകുമാരന്റെ ഉടമസ്ഥതയിലുള്ള എസ്.ആര്‍ ഗ്രൂപ്പില്‍പ്പെട്ട കൊട്ടിയൂര്‍, പേരാവൂര്‍, ഇരിട്ടി റൂട്ടില്‍ സര്‍വിസ് നടത്തുന്ന അര്‍ജുന്‍ ബസും മാട്ടറ, ഇരിട്ടി, മട്ടന്നൂര്‍ റൂട്ടില്‍ സര്‍വിസ് നടത്തുന്ന സിറ്റി ബോയ് ബസുമാണു കാരുണ്യ സര്‍വീസ് നടത്തി മാതൃകയായത്. മാട്ടറയില്‍ സി.പി.എം ഇരിട്ടി ഏരിയാ സെക്രട്ടറി ബിനോയ് കുര്യനും കൊട്ടിയൂരില്‍ പഞ്ചായത്ത് പ്രസിഡന്റ് ഇന്ദിര ശ്രീധരനും കാരുണ്യ സര്‍വിസ് ഉദ്ഘാടനം ചെയ്തു.