പാലക്കാട്: വാളയാര്‍ ചെക്‌പോസ്റ്റില്‍ ഗതാഗത കമ്മീഷണര്‍ ടോമിന്‍ തച്ചങ്കരിയുടെ മിന്നല്‍ പരിശോധന. ചെക്‌പോസ്റ്റിലെ അഴിമതി കണ്ടെത്താന്‍ അര്‍ധരാത്രിയിലാണ് തച്ചങ്കരിയുടെ മിന്നല്‍ പരിശോധന. ചെക്‌പോസ്റ്റില്‍ കൈക്കൂലി വാങ്ങി പരിശോധനയില്ലാതെ വാഹനങ്ങള്‍ കടത്തിവിടുന്നതായും കണ്ടെത്തി. അതു പോലെ മൂന്നു ലക്ഷം രൂപയുടെ നികുതി വെട്ടിച്ചു കടന്ന അഞ്ച് വാഹനങ്ങള്‍ കമ്മീഷണര്‍ അരമണിക്കൂര്‍ കൊണ്ട് പിടികൂടി.

ദേശീയപാതയിലൂടെ പാലക്കാട് ഭാഗത്തേക്ക് വന്ന വാഹനങ്ങളാണ് ടോമിന്‍ തച്ചങ്കരി പരിശോധിച്ചത്. പെര്‍മിറ്റില്ലാതെയും ടാക്‌സ് അടയ്ക്കാതെയും നിരവധി യാത്രാവാഹനങ്ങളും ചരക്കുലോറികളും ചെക്‌പോസ്റ്റിലെത്തി. ആര്‍.ടി.ഒ ചെക്‌പോസ്റ്റില്‍ കൈക്കൂലി കൊടുത്തിട്ടുണ്ടെന്നും വിട്ടയയ്ക്കണമെന്നും ഡ്രവൈര്‍മാര്‍ പറഞ്ഞു. എന്നാല്‍, പണം കൊടുത്തതിന് രേഖകളില്ല.
ജോലിയില്‍ വീഴ്ച വരുത്തിയ ഗതാഗത, വാണിജ്യനികുതി ഉദ്യോഗസ്ഥര്‍ക്കെതിരേ നടപടി ആവശ്യപ്പെട്ടു. സര്‍ക്കാരിനു റിപ്പോര്‍ട്ട് നല്‍കുമെന്ന് കമ്മീഷണര്‍ പറഞ്ഞു.