സുനി അൽഹാദി
കൊച്ചി
കേരളത്തിലെ പൊലിസ് സ്റ്റേഷനുകൾ ഇനി കാമറ നിരീക്ഷണത്തിൽ. സംസ്ഥാനത്തുടനീളമുള്ള ഓരോ പൊലിസ് സ്റ്റേഷനിലും ഒരു ഡസൻവീതം നിരീക്ഷണ കാമറകൾ സ്ഥാപിക്കാനാണ് സംസ്ഥാന ആഭ്യന്തര വകുപ്പിന്റെ പദ്ധതി. ഇതിനുള്ള ടെൻഡർ നടപടികൾ ആരംഭിച്ചുകഴിഞ്ഞു. 41.6 കോടി രൂപയുടെ പദ്ധതിയാണ് ഇതിനായി വിഭാവനം ചെയ്തിരിക്കുന്നത്.രാജ്യത്തുടനീളമുള്ള പൊലിസ് സ്റ്റേഷനുകളിൽ കസ്റ്റഡിമരണങ്ങളും മർദനങ്ങളും വർധിച്ചുവരുന്ന സാഹചര്യത്തിൽ സുപ്രിംകോടതിയാണ് നിരീക്ഷണ കാമറകൾ സ്ഥാപിക്കാൻ നിർദേശം നൽകിയത്. കഴിഞ്ഞ ഡിസംബർ 31നകം ഇത് നടപ്പാക്കണമെന്നായിരുന്നു നിർദേശമെങ്കിലും കൊവിഡ് സാഹചര്യത്തിൽ നീണ്ടുപോകുകയായിരുന്നു.
സംസ്ഥാനത്തെ മുഴുവൻ പൊലിസ് സ്റ്റേഷനുകളിലും സ്ഥാപിക്കുന്നതിനായി 5770 നിരീക്ഷണ കാമറകളും വാഹനങ്ങളിൽ ഉപയോഗിക്കാവുന്ന 520 കാമറകളും സ്ഥാപിക്കാനാണ് നിർദേശം.
ഇതിനു പുറമേ 50 കാമറകൾ കരുതൽ ശേഖരമായും വയ്ക്കും. ഓരോ പൊലിസ് സ്റ്റേഷന്റെയും പ്രധാന പ്രവേശന കവാടം, ഇടനാഴികൾ, ശുചിമുറികളുടെ മുൻവശം, ഡ്യൂട്ടി ഓഫിസറുടെ മുറി, ഇൻസ്‌പെക്ടറുടെ മുറി, പൊലിസ് സ്റ്റേഷനുകളുടെ പിൻവശം, കവാടം തുടങ്ങിയ പ്രധാന സ്ഥലങ്ങളിലെല്ലാം നിരീക്ഷണ കാമറകൾ സ്ഥാപിക്കാനാണ് നിർദേശം.
ഇതുകൂടാതെ ഓരോ ലോക്കപ്പിലും രണ്ടു കാമറകളും സ്ഥാപിക്കും. ഈ കാമറകളെല്ലാം പൊലിസ് ജില്ലാ ആസ്ഥാനത്തെ കൺട്രോൾ റൂമുമായി ബന്ധിപ്പിക്കും. കൺട്രോൾ റൂമിൽ മുഴുവൻ സമയ നിരീക്ഷണവും ഏർപ്പെടുത്തും. ഇതുകൂടാതെ ഓരോ കാമറയിലെയും ദൃശ്യങ്ങൾ ഒന്നര വർഷംവരെ സൂക്ഷിക്കാനുള്ള സംവിധാനങ്ങളും ഏർപ്പെടുത്തും. നിലവിൽ സംസ്ഥാനത്തെ 274 സ്റ്റേഷനുകളിലായി 548 നിരീക്ഷണ കാമറകളുണ്ട്. അവയും ഈ സംവിധാനത്തിന്റെ ഭാഗമാകും.