തിരുവനന്തപുരം: മുഖ്യമന്ത്രിക്കും മന്ത്രിമാര്‍ക്കുമെതിരേ കടുത്ത വിമര്‍വുമായി സി.പി.ഐ. നിയമനങ്ങളുമായി ബന്ധപ്പെട്ട് മുഖ്യമന്ത്രി ഇന്ന് നടത്തിയ പ്രതികരണങ്ങളും സെക്രട്ടറിയേറ്റിലടക്കം നടക്കുന്ന സമരങ്ങളോട് അസഹിഷ്ണുതാ നിലപാട് സ്വീകരിക്കുന്നതിനെയുമാണ് സി.പി.ഐ വിമര്‍ശിച്ചത്.
മന്ത്രിമാരായ തോമസ് ഐസക്കിന്റെയും ഇ.പി ജയരാജന്റെയും പ്രതികരണം അനാവശ്യമായിരുന്നു. യുവാക്കള്‍ സര്‍ക്കാരിന് എതിരാകുന്ന സാഹചര്യം ഒഴിവാക്കണമെന്നും സിപിഐ സംസ്ഥാന എക്‌സിക്യുട്ടീവ് യോഗത്തില്‍ വിമര്‍ശനമുയര്‍ന്നു.
നിയമവുമായി ബന്ധപ്പെട്ട് സമരം ചെയ്യുന്നവരോട് അസഹിഷ്ണുത നിലപാട് വേണ്ടെന്നും ഉദ്യോഗാര്‍ത്ഥികളുടെ സമരങ്ങളെ മന്ത്രിയടക്കം വിമര്‍ശിച്ചത് തെറ്റാണെന്നും സിപിഐ നിലപാട് വ്യക്തമാക്കുന്നു.

പി.എസ്.സി വഴിയുള്ള നിയമനങ്ങള്‍ സുതാര്യമായി നടക്കുമ്പോള്‍ വസ്തുതകളെല്ലാം മറച്ചു വച്ച് ഉദ്യോഗാര്‍ഥികള്‍ക്ക് ഇടയില്‍ തെറ്റിദ്ധാരണ പരത്താനാണ് ഇപ്പോള്‍ ശ്രമം നടക്കുന്നതെന്നായിരുന്നു മുഖ്യമന്ത്രി പിണറായി വിജയന്റെ ഇന്നത്തെ പ്രതികരണം. ജോലിക്കാര്യം പറഞ്ഞ് വ്യാമോഹിപ്പിച്ചു നിരപരാധികളായ യുവാക്കളെ തെരുവില്‍ ഇറക്കാന്‍ ചില കേന്ദ്രങ്ങള്‍ ശ്രമിക്കുകയാണെന്നും അദ്ദേഹം കൂട്ടിച്ചേര്‍ത്തു. അപകടകരമായ ചില കളികളും കണ്ടു. ഒരു ലിസ്റ്റിലും പെടാത്ത ആളുകളും വൈകാരിക പ്രകടനം നടത്തി. സൂക്ഷിച്ചു ചെയ്യേണ്ട കാര്യമാണ്. രാഷ്ട്രീയ താല്പര്യം നേടാന്‍ ജീവന് അപകടം വരുത്തുന്നത് മനുഷര്‍ക്കു ചേര്‍ന്ന പ്രവര്‍ത്തി അല്ലെന്നും മുഖ്യമന്ത്രി ഓര്‍മ്മിപ്പിച്ചു. ഇതെല്ലാം സി.പി.ഐയെ ചൊടിപ്പിച്ചിട്ടുണ്ടെന്നാണറിയുന്നത്.