കൊച്ചി: കോണ്‍ഗ്രസിന്റെ ഐശ്വര്യ കേരള യാത്രത്തില്‍ പ്രതിപക്ഷ നേതാവ് രമേശ് ചെന്നിത്തലയുമായി വേദി പങ്കിട്ട മേജര്‍ രവിയെ അനുനയിപ്പിക്കാനുള്ള ശ്രമവുമായി ബി.ജെ.പി നേതാക്കള്‍. ആര്‍.എസ്.എസ്, ബി.ജെ.പി നേതാക്കള്‍ മേജര്‍ രവിയുമായി സംസാരിച്ചു.

ചെന്നിത്തലയുടെ ഐശ്വര്യ കേരളയാത്ര തൃപ്പൂണിത്തുറയിലെത്തിയപ്പോഴായിരുന്നു മേജര്‍ രവി വേദിയിലെത്തുകയും ബി.ജെ.പി സംസ്ഥാന നേതൃത്വത്തിനെതിരെ സംസാരിക്കുകയും ചെയ്തത്. ഈ പശ്ചാത്തലത്തിലാണ് ബി.ജെ.പി. നേതാക്കള്‍ അനുനയനീക്കം നടത്തുന്നത്. ബിജെപിയുടെ പ്രധാന നേതാക്കള്‍ അദ്ദേഹവുമായി ഫോണില്‍ സംസാരിച്ചു.

ബി.ജെ.പി അനുഭാവിയായിരുന്ന മേജര്‍ രവി ഇടക്കാലത്ത് പി രാജീവിന് വോട്ട് ചോദിച്ച് പൊതുപരിപാടിയിലും രംഗത്തെത്തിയിരുന്നു. സംസ്ഥാനത്തെ ബി.ജെ.പി നേതാക്കള്‍ക്കെതിരേ ഗുരുതര ആരോപണവുമായി നേരത്തേയും മേജര്‍ രവി രംഗത്തെത്തിയിരുന്നു. 90 ശതമാനം ബി.ജെ.പി നേതാക്കളും വിശ്വസിക്കാന്‍ കൊള്ളാത്തവരാണെന്നും ഇവിടത്തെ നേതാക്കന്മാര്‍ക്ക് മസില്‍ പിടിച്ചു നടക്കാന്‍ മാത്രം കഴിയുകയുള്ളൂവെന്നും രാഷ്ട്രീയം ജീവിതമാര്‍ഗം ആക്കിയിരിക്കുന്നവരാണ് ബി.ജെ.പി നേതാക്കള്‍ എന്നും മേജര്‍ രവി ആരോപണമുന്നയിച്ചു. താഴെത്തട്ടിലുള്ള ജനങ്ങളെ ഇവര്‍ തിരിഞ്ഞു നോക്കാറില്ലെന്നും ഗ്രൂപ്പ് പറഞ്ഞ് പാര്‍ട്ടിയെ തകര്‍ക്കാന്‍ ആണ് ഇവര്‍ ശ്രമിക്കുന്നതെന്നും മേജര്‍ രവി പറഞ്ഞു.

കഴിഞ്ഞ ദിവസം കെ.പി.സി.സി അധ്യക്ഷനുമായി അദ്ദേഹം കൂടിക്കാഴ്ച നടത്തുകയും ഇതിന്റെ ചിത്രങ്ങള്‍ കെ.പി.സി.സി അധ്യക്ഷന്‍ തന്റെ ഫേസ്ബുക്ക് പേജില്‍ പങ്കുവയ്ക്കുകയും ചെയ്തിരുന്നു.