സ്വന്തം ലേഖകന്‍
തിരുവനന്തപുരം: നിയമസഭാ തെരഞ്ഞെടുപ്പില്‍ കെ.പി.സി.സി മുന്‍ പ്രസിഡന്റ് വി.എം സുധീരനെ മത്സരരംഗത്തിറക്കാന്‍ സമ്മര്‍ദം. ഇതിന്റെ ഭാഗമായി എ.ഐ.സി.സി പ്രതിനിധികള്‍ സുധീരനുമായി കൂടിക്കാഴ്ച നടത്തി.
എ.ഐ.സി.സി സെക്രട്ടറിമാരായ പി.വി മോഹനന്‍, പി. വിശ്വനാഥ് എന്നിവരാണ് ഇന്നലെ സുധീരനെ വീട്ടിലെത്തി കണ്ടത്. നേരത്തെ തിരുവനന്തപുരത്ത് വട്ടിയൂര്‍ക്കാവില്‍ സുധീരനെ മത്സരിപ്പിക്കാന്‍ സാധ്യതയുണ്ടെന്നായിരുന്നു റിപ്പോര്‍ട്ടുകളെങ്കില്‍ ഇപ്പോള്‍ മലബാര്‍ മേഖലയില്‍ മത്സരിപ്പിക്കാനാണ് ചര്‍ച്ച നടക്കുന്നത്. ഇന്നലെ സുധീരനെ കാണാനെത്തിയ പി.വി മോഹനന് മലബാര്‍ മേഖലയുടെ ചുമതലയാണുള്ളത്. കോഴിക്കോട് നോര്‍ത്തിലോ കൊയിലാണ്ടിയിലോ മത്സരിപ്പിക്കാനുള്ള സാധ്യതയാണ് നേതൃത്വം ആരായുന്നത്.

എന്നാല്‍ മലബാര്‍ മേഖലയിലെ പാര്‍ട്ടിയുടെ സാധ്യതകളാണ് ചര്‍ച്ച ചെയ്തതെന്നും താന്‍ മത്സരിക്കുന്നത് ചര്‍ച്ചയാകേണ്ട സാഹചര്യമില്ലെന്നുമായിരുന്നു സുധീരന്റെ പ്രതികരണം.

താന്‍ മത്സരിക്കുന്നില്ലെന്നത് നേരത്തെ തന്നെ നേതൃത്വത്തെ അറിയിച്ചിരുന്നെന്നും സുധീരന്‍ പറഞ്ഞു.
കോണ്‍ഗ്രസില്‍ സ്ഥാനാര്‍ഥി നിര്‍ണയം സംബന്ധിച്ച് തിരക്കിട്ട ചര്‍ച്ചകള്‍ നടക്കുന്നതിനിടെയാണ് എ.ഐ.സി.സി പ്രതിനിധികള്‍ സുധീരനെ കാണാനെത്തിയത്.
ഒരു മണിക്കൂറിനു ശേഷമാണ് അവര്‍ മടങ്ങിയത്. തെരഞ്ഞെടുപ്പില്‍ സുധീരനെ മത്സരരംഗത്തിറക്കുന്നത് പൊതുവെ ഗുണം ചെയ്യുമെന്ന് നേരത്തെ തന്നെ വിലയിരുത്തലുണ്ടായിരുന്നു.